Fransa Milli Kitabxanası  (Bibliotheque Nationale de France) öz rəflərindən üz qabığı çox zəhərli arsenlə işlənmiş dörd kitabı yığışdırıb. Kitablar 19-cu əsrdə Britaniyada çap olunmuş cildlərdir. 

Sfera.az bildirir ki, müsadirə olunan kitablar karantinə alınıb. Hər bir cilddə nə qədər arsenin olduğunu qiymətləndirmək üçün kənar laboratoriya tərəfindən təhlil ediləcək.

Kitabların üz qabığında zümrüd yaşıl bağlamalar var. Qeyd edək ki, o dövrdə arsendən kitabları rəngləmək üçün geniş istifadə olunurdu. Viktoriya nəşriyyatları alman əsilli kimyaçının adını daşıyan "Paris Green", "Emerald Green" və "Scheele Green" kimi piqmentlərlə kitab bağlamalarını boyamaq üçün bu zəhərdən istifadə ediblər.

Rəflərdən çıxarılan dörd potensial təhlükəli kitaba Kral Bağçılıq Cəmiyyətinin 1862-1863-cü illərə aid kitabı, Edvard Hayesin 1855-ci ildə yazdığı İrlandiya balladasının iki cildi və Henri Stenlinin 1856-cı ildə ikidilli Rumıniya poeziya antologiyası daxildir.

Xatırladaq ki, 2019-cu ildən bəri Delaver Universitetinin Poison Book komandası ağır metallar üçün yüzlərlə kitab üzlüyünü sınaqdan keçirib və potensial təhlükəli kitabların siyahısını tərtib edib. Tədqiqatçılar qeyd edirlər ki, toksinlə örtülmüş kitablar diqqətlə saxlanılmalıdır, çünki bu kitablar onlarla işləyənlərin sağlamlığı üçün təhlükə yarada bilər.

Kolleksiyasında bu cür üzlüklü kitabların tapılmasına cavab olaraq, Fransa Milli Kitabxanasından: 

“Zəhər layihəsi siyahısından kənarda olan digər kitablar da yoxlanılacaq”-deyə bildirilib.

Aysel

Sfera.az