Cümhuriyyət Xalq Partiyasının (CHP) Hatay Ali Seçki Qurumuna (YSK) etdiyi etirazı rədd edilib.

Sfera.az xəbər verir ki, CHP həyatını itirmiş seçicilərin də "səs verdiyini" və həmin nəticələrin qeydə alındığını iddia edib. 

Bu səbəblə sədr Özgür Özel və CHP-nin Hatay namizədi Lütfü Savaş YSK qarşısında olub.

AK Partiyanın YSK-dakı nümayəndəsi Recep Özel isə bu iddiaya reaksiya verib:

"CHP 87 səhifəlik ərizə verdi. Orada 3389 nəfərin öldüyü halda səs verdiyi deyilir. Tamamilə yalandır. Onlar kimdir, adlarını ərizədə yazarsınız".

Daha sonra toplaşan YSK Seçki Şurası CHP-nin etirazlarını müzakirə edərək, həyatını itirən seçicilərlə bağlı iddialar da daxil olmaqla etirazları rədd edib.

CNN TÜRK yayımına danışan Hatay Bələdiyyə başçısı Mehmet Öntürk seçki müzakirələrinin YSK-nın qərarı ilə yekunlaşdığını deyib: “Seçki müzakirələri əslində proses başladığı andan bitdi. Hatay qərarını vermişdi. İndi işimizlə məşğuluq. Bizim prioritetimiz şəhərimizi mümkün qədər tez ayağa qaldırmaqdır".

Əzizə Zeynal