Baydenin yaşı və psixoloji sağlamlığı yenidən gündəm olub.

Sfera.az bildirir ki, ABŞ Prezidentinin evindəki məxfi sənədləri araşdıran xüsusi prokuror Robert Hur tərəfindən hazırlanan son hesabat müzakirələr yaradıb.

Belə ki, ABŞ Ədliyyə Departamenti Baydenin 2016-cı ildən bəri məxfi sənədlərdən necə istifadə etməsi ilə bağlı hesabat yayıb.

Bununla belə, sənədlərdə Ağ Ev rəhbərinin sağlamlıq vəziyyəti ön plana çıxıb. 388 səhifəlik hesabatdakı təfərrüatlara görə, 81 yaşlı Bayden, Barak Obama administrasiyası dövründə vitse-prezident olmuş, 2015-ci ildə xərçəngdən dünyasını dəyişən oğlu Bounun ölüm tarixini xatırlamır. Hadisəni araşdıran xüsusi komissiya prezidentin yaddaşının problemli olduğuna diqqət çəkib və onu "yaddaşı zəif olan yaxşı niyyətli qoca" adlandırıb.

Sözügedən hesabatdan sonra ABŞ Nümayəndələr Palatasının spikeri, respublikaçı Mayk Conson Baydenin prezidentliyə uyğun olmadığını iddia edib.

Trampın sözçüsü Karolin Leavitt “Əgər yaddaşı bu qədər pisdirsə, ölkəmizi idarə edəcəyinə necə etibar edə bilərik?” deyib.

Bayden isə ona hesabatla bağlı sual verən jurnalistlərə qəzəblənib və “Yaddaşım çox yaxşıdır”, - vurğulayıb.

“Bəli, qocalmışam, amma nə etdiyimi çox yaxşı bilirəm. Oğlumun öldüyü zamana qalanda isə, kiminsə bunu mənə xatırlatmasına ehtiyacım yoxdur".

Qeyd edək ki, 81 yaşlı Bayden tez-tez yaşı, yaddaş vəziyyəti və kobud səhvləri ilə gündəmə gəlir. Lakin bu, noyabrda keçiriləcək seçkilər öncəsi önəmli məsələyə çevrilib.

Xatırladaq ki, ABŞ-nin keçmiş prezidenti Donald Tramp da evindən tapılan məxfi sənədlərə görə mühakimə olunur. May ayında Floridada mühakimə olunacaq Trampdan fərqli olaraq, Bayden hüquqi prosesə mane olmayıb və əməkdaşlığa razılaşıb. Tramp isə uzun müddət ona qarşı irəli sürülən ittihamları rədd edib və qarayaxma kampaniyası aparıldığını iddia edib.

Günay