Nigeriyanın cənub-qərbində silahlı şəxslər monarxı güllələyib, həyat yoldaşını və əlavə bir nəfəri qaçırıblar.

Sfera.az xəbər verir ki, hadisə dünən gecə baş verib.

Belə ki, silahlılar istefada olan ordu generalı və ənənəvi hökmdar Sequn Aremunun (rəsmi adı ilə Koro Olukoro) sarayına basqın ediblər.

Silahlıların kim olduğu və bu əməli nə üçün törətdikləri bəlli deyil. Polis axtarışın davam etdiyini bildirib. 

Qeyd edək ki, qaçırılma hadisələri Nigeriyada ilk deyil. Prezident Bola Tinubu keçən may ayında vəzifəyə gələndən bəri 1800-dən çox adamın oğurlandığını bildirib.

Bəzi silahlı qruplar insanları qaçıraraq qarşılığında pul istəyirlər. Dövlət bu hadisələrdə vətəndaşların pul ödəmələrini qadağan etsə də, yaxınları qaçırılanlar məcbur qalaraq bu addımı atırlar.

Eyni zamanda, Nigeriyada konstitusiyada rolu olmayan, lakin icma həyatında hörmətli mövqe tutan yüzlərlə ənənəvi hökmdarlar yaşayır. Adi dillə desək, ənənəvi hökmdar bir etnik qrupun adət-ənənələrini, tarixini qoruyan və xalq tərəfindən təyin olunan şəxsdir. Onlar tez-tez yerli insanlar arasında mübahisələri həll etmək və mədəni fəaliyyətlərə rəhbərlik etmək üçün çağırılırlar. 

Firuzə Əliyeva