Dağıstan Respublikasının Buynaksk şəhərində ticarət mərkəzləri kompleksi yanıb.
 

Sfera.az bildirir ki, yanğın əvvəlcə Mərkəzi Univermağın ikimərtəbəli binasında baş verib, daha sonra qonşu ticarət mərkəzlərinə keçib. Yanğın sahəsi ən azı 1200 kvadratmetrdir.
 

KİV-in məlumatına görə, ikimərtəbəli binanın dam örtüyü yanıb. Daha sonra, Rusiya Fövqəladə Hallar Nazirliyi 27 nəfərin təxliyə edildiyini bildirib.


Rusiya təhlükəsizlik rəsmiləri yanğının səbəbini açıqlamayıb.

Qeyd edək ki, ötən gün Moskvada Rusiya Federasiyası Kommunist Partiyası komitəsinin binası da yanıb. Fövqəladə Hallar Nazirliyinin məlumatına görə, paytaxtım mərkəzində yerləşən inzibati binanın ikinci mərtəbəsi yanıb. Yanğın sahəsi 10 kvadratmetr olub.

Çərşənbə günü, yanvarın 24-də Rusiyanın Krasnodar diyarının Tuapse şəhərində partlayış səsləri eşidilib, daha sonra “Rosneft” neft bazasında yanğın baş verdiyi məlum olub.

Yanvarın 21-də Sankt-Peterburq yaxınlığındakı limanda yanğın baş verib. “Novatek” şirkətinin Ust-Luqa neft terminalının obyektlərinə pilotsuz təyyarələrin hücum edildiyi, iki partlayış baş verdiyi bildirilib.

Aysel

Sfera.az