Avropada hərbi dəhliz YARADILIR: Ordu daha sürətlə hərəkət edəcək

Hollandiya, Polşa və Almaniya hərbi dəhliz yaratmaq haqqında bəyannamə imzalayıblar.

Sfera.az “Reuters”ə istinadən xəbər verir ki, bununla bağlı məlumatı “X”də (keçmiş “Twitter”) Hollandiya müdafiə naziri vəzifəsini icra edən Kaysa Ollonqren açıqlayıb.

Ollonqrenin şərhinə görə, razılaşmanın əldə edilməsində məqsəd ordunun sərhədləri keçən zaman bürokratik maneələri aradan qaldırmaqdır: “Biz mühüm addım atdıq. Nəzərdə tutulan dəhliz Şimal dənizindən NATO-nun şərq cinahına qədər olan əsas dəhlizlərdən birinə aiddir. Hərbi personalı və yükləri daha sürətli və səmərəli şəkildə daşımaq üçün bizə “hərbi Şengen” lazımdır”.

Ollonqren bu tədbirin Avropanı daha da gücləndirəcəyinə əminliyini ifadə edib. Müqavilə yanvarın 30-da imzalanıb.

“The Times” daha əvvəl yazmışdı ki, NATO “hərbi Şengen” sistemi çərçivəsində bütün Avropada hərbi dəhlizlərin yaradılması ilə bağlı danışıqlar aparır. Belə bir azad hərbi hərəkət zonasının yaradılması ilə bağlı NATO-nun Birgə Logistika Komandanlığının rəhbəri Aleksandr Solfrank çağırış etmişdi.

Vasif