İraq hökuməti ABŞ qoşunlarını ölkədən ÇIXARACAQ
"ABŞ və İraq qoşunların çıxarılması ilə bağlı danışıqlara başlayacaq".
Sfera.az xəbər verir ki, bunu İraqın Baş naziri Məhəmməd Şia əl-Sudani deyib.
O, beynəlxalq koalisiyanın İraq torpaqlarında mövcudluğu üçün əsasların tükəndiyini bildirib:
“Bağdad ölkədə xarici hərbi mövcudluğa son qoymaq üçün konkret tədbirlər görməyə hazırdır”.
O, həmçinin qeyd edib ki, İraq hökuməti xarici qoşunların çıxarılması məsələsini həll etmək üçün yaradılmış ikitərəfli komissiya çərçivəsində danışıqların başlama tarixini müəyyən etmək mərhələsindədir.
Bəyanat ABŞ-nin pilotsuz təyyarəsinin Bağdada endirdiyi zərbələr zamanı “Hərəkat ən-Nucaba” hərəkatının lideri Əbu Təqvanın öldürülməsi ilə bağlı xəbərlərdən sonra verilib.
Müdafiə Nazirliyinin sözçüsü Pat Rayder İraq hökumətinin məsələ ilə bağlı verdiyi hər hansı sorğudan xəbərsiz olduğunu qeyd edib. O əlavə edib ki, ABŞ qüvvələri İraqın qanuni hökumətinin tələbi ilə ölkədə qalır.
Xatırladaq ki, Pentaqon yanvarın 8-də qoşunlarını İraqdan çıxarmağı planlaşdırmadığını bildirib. Qeyd edilib ki, hazırda 2500-ə yaxın ABŞ hərbçisi İraqdakı müxtəlif bazalarda yerləşdirilib.
Firuzə Əliyeva
