Xəbər verdiyimiz kimi, blogger və teleaparıcı Nastya İvleevanın təşkil etdiyi qalmaqallı “çılpaq gecənin” iştirakçılarından biri də Filipp Kirkorov olub. Şou Rusiya cəmiyyətində böyük rezonans doğurub və onun iştirakçıları kamera qarşısında üzr istəməli olublar. Bəzilərinə, o cümlədən İvleevaya qarşı vergidən yayınma ittihamı irəli sürülüb.

Sfera.az bildirir ki, İvleevanın şousundan sonra Filipp Kirkorov, bir çox digər qonaqlar kimi, problemlər yaşamağa başlayıb. Onun Yeni il çəkilişləri kəsilib və konsertlərdən kənarlaşdırılıb. Kirkorov da külli miqdarda cərimə ödəməli olub, bundan sonra Rusiya Federasiyasını tərk edib. İndi isə onu ABŞ-da görüblər.

Rusiyanın xalq artisti, müğənni Filipp Kirkorov təxminən 8 milyon rubl məbləğində vergi borcunda da ittiham olunub.

Kirkorovun Böyük Pyotr rolunu canlandırdığı "İvan Vasilyeviç hər şeyi dəyişdirir" serialında aktyor Nikita Koloqrivlə əvəzlənib, Yeni il çəkilişlərindən də tələsik şəkildə kəsilib. Daha sonra məlum olub ki, müğənni “Taleyin öz ironiyası” filmindən çıxarılıb, Yeni il konsertlərindən uzaqlaşdırılıb və “Qızıl qrammofon Sankt-Peterburq” şousunun iştirakçıları siyahısından çıxarılıb. Onun adı tədbirin anons səhifəsindən çıxarılıb, müğənninin üzü isə konsert afişasından silinib.

Bu həftə isə məlum olub ki, Alla Puqaçovanın keçmiş əri Rusiyanı tərk edib. Onu ABŞ-da görüblər. Müğənni pop-diva Madonnanın Nyu-Yorkda “Madison Square Garden”da baş tutan konsertinə qatılıb.

Onu Donetskdən olan dostu, gənc dizayner Maksim Sitnik müşayiət edib.

Xatırladaq ki, 2023-cü il dekabrın 20-dən 21-nə keçən gecə Moskvanın “Mutabor” gecə klubunda demək olar ki, tamamilə çılpaq geyim kodu ilə əyləncə gecəsi baş tutub. Tədbir ətrafında qalmaqal alovlanmağa başlayandan sonra müğənni Rusiya prezidentinin mətbuat katibi Dmitri Peskova gecəyə təsadüfən gəldiyini deyib. Sonra üzrxahlıq videosunu yayımlayıb və şounun formatından xəbərsiz olduğunu deyib.

İctimaiyyətdən üzr istəməsinə baxmayaraq, şouda iştirak edən qonaqlar bir-bir “ələnməyə” başlanıb. Belə ki, cinsi orqanına corab geyindirərək, məclisin ulduzuna çevrilən rusiyalı reper Vacio yazda əsgərliyə göndəriləcək.

Nastya İvleevanın özünə qarşı rekord məbləğdə (1 milyard rubl) mənəvi zərərin ödənilməsi üçün iddia qaldırılıb. Qeyd edək ki, iddia prodüser Aleksandr İnşakovun rəhbərlik etdiyi təşəbbüs qrupu tərəfindən qaldırılıb.

Aysel

Sfera.az

Qalmaqallı şoudan sonra Filipp Kirkorov ABŞ-a getdi - FOTO