Kahramanmaraş zəlzələsindən 1 ilə yaxın vaxt keçir - Hansı işlər görülüb?
Fevralın 6-da Türkiyədə baş verən dağıdıcı zəlzələnin 1 ili tamam olacaq.
Sfera.az xəbər verir ki, dərinliyi 7 kilometr olan zəlzələ Hatay, Qaziantep, Kilis, Osmaniye, Malatya, Adıyaman, Şanlıurfa, Diyarbəkir, Adana və Kahramanmaraş vilayətlərində ciddi dağıntılara səbəb olub.
Kahramanmaraş fəlakətindən sonra zəlzələ qurbanlarının ən qısa zamanda evlərinə dönmələrini təmin etmək üçün infrastruktur işləri sürətlə davam etdirilib. 1 ili əhatə edən zaman kəsiyində zəlzələ bölgəsində tikintisi planlaşdırılan 100 min kənd evinin hamısı polad konstruksiyadan tikilib.
“Polad ev” qərarı Ekologiya, Şəhərsalma və İqlim Dəyişiklikləri Nazirliyinin nəzdində keçirilən “Zəlzələ Faktları və Şəhər Çevrilmə Şurası” tərəfindən verilib. Bu çərçivədə, xüsusilə, zəlzələ bölgələrində yeni tikilən yaşayış evlərində polad konstruksiyadan istifadə edilib.
Tikilən evlərin çöl və içərisinə üzlük materiallarına ən azı 10 santimetr daş yunu döşənib. Daş yunu ilə təhlükəsizlik təmin edilərkən, digər tərəfdən izolyasiya ilə enerjiyə qənaət edilib.
6 fevral zəlzələsindən təsirlənən vilayətlərdə 200 min evdən 41 min bina evi və 4 min 807 kənd evinin tikintisi başa çatdırılıb. İnsanlara dəstək məqsədilə yaşayış yerlərində evin kvadrat metrinə görə 500 min ilə 800 min TL arasında kredit veriləcək.
Qeyd edək ki, “Polad evlərə” üz tutan ölkələrdən biri də Yaponiyadır. Nazirlik qrupları tikinti prosesinə başlamazdan əvvəl bütün dünyada bu strukturların nümunələrini araşdırıblar.
Xatırladaq ki, Prezident İlham Əliyev 2023-cü il sentyabrın 25-də Türkiyədəki dağıdıcı zəlzələ barəsində Saziş imzalayıb. Sazişə əsasən, Azərbaycan Türkiyənin Kahramanmaraş vilayətində yaşayış binaları, ibtidai məktəb, uşaq bağçası və mədəniyyət mərkəzinin tikilməsi üçün 100 milyon ABŞ dolları ayırıb.
Həmçinin zəlzələnin ilk günlərində Azərbaycan Türkiyəyə dəstəyini nümayiş etdirirək, dərhal axtarış və xilasetmə dəstələri, tibbi heyət, könüllülər, habelə humanitar yardımlar göndərib.
Ülkər Abdurahmanlı