Yaponiyanın Noto yarımadasında 7,5 bal gücündə zəlzələ baş verib. 

Sfera.az xəbər verir ki, Yaponiya Meteorologiya Agentliyi (JMA) sunami xəbərdarlığı edib və sakinləri təxliyə etməyə çağırıb.

Agentliyin yaydığı açıqlamada zəlzələ nəticəsində ölən və ya yaralananların olub-olmaması ilə bağlı hələlik məlumat verilmir.

Rəsmilər Yaponiya Dövlət Televiziyasında açıqlama verərək zəlzələnin episentrinin yerləşdiyi İşikava bölgəsində sahilə dəyən dalğaların 5 metrə çata biləcəyini bildiriblər. Ərazidə yaşayan sakinlər sığınacaq tapıb daha yüksək ərazilərə köçməyə çağırılıb. Səlahiyyətlilər bölgə əhalisinə xəbərdarlıqlarında vurğulayıb ki, baş verə biləcək faciənin qarşısını almaq üçün vəziyyətə ciddi yanaşmaq lazımdır.

Yarımadada baş verən zəlzələdən sonra 6,2, 5,2, 5,4 və 5,6 bal gücündə afterşoklar da qeydə alınıb. Zəlzələlərin yerin 10 kilometr dərinliyində baş verdiyi bildirilib. Zəlzələnin maqnitudası ilkin məlumatlarda 7,5 bal kimi əks olunub.

Əzizə