“Daha çox uşaq dünyaya gətirin” – Mənzil, təhsil, ərzaq yardımı…
Şimali Koreya lideri Kim Çen In ölkədə doğum nisbətinin azalmasını dayandırmağın “qadınların vəzifəsi” olduğunu bəyan edib və qadınları daha çox uşaq dünyaya gətirməyə çağırıb.
Sfera.az xəbər verir ki, Kim Milli Analar Yığıncağının açılışındakı çıxışında bildirib ki, doğum nisbətlərindəki azalmanı dayandırmaq , uşağa yaxşı baxım və təhsil vermək analarla birlikdə həll edilməli olan ailə problemləridir.
Digər tərəfdən, Şimali Koreyada sağlamlıq problemləri ilə məşğul olan "dprkhealth.org" saytının rəsmisi Ahn Kyung-su qeyd edib ki, ölkədəki bir çox ailə birdən çox uşaq sahibi olmağı düşünmür:
“Ailələr uşaqlarını böyütmək, onları məktəbə göndərmək və işlə təmin etmək üçün külli miqdarda pul xərcləməli olduğunun fərqindədir”.
Şimali Koreyanın dövlət mediasında bu il yayılan xəbərlər göstərir ki, Pxenyan üç və ya daha çox uşağı olan ailələrə pulsuz mənzil, ərzaq, dərman, məişət əşyaları və uşaqlara təhsil dəstəyi də daxil olmaqla bir sıra yardımlar edib.
Cənubi Koreya Statistika Agentliyi Şimali Koreyanın hazırkı əhalisinin 25,7 milyon civarında olduğunu açıqlasa da, cənublu rəsmilər Şimali Koreyanın doğuş nisbətinin son 10 ildə durmadan azaldığını bildiriblər.
Firuzə Əliyeva
