Qazaxıstan əhalisinin sayı ilk dəfə 20 milyonu ötdü - Türklərin sayı ARTIB

Qazaxıstan əhalisinin sayı ilk dəfə olaraq 20 milyon nəfəri ötüb. 

Sfera.az xəbər verir ki, bu haqda məlumatı Qazaxıstan Prezidenti Kasım-Jomart Tokayev açıqlayıb.

Qazaxıstan əhalisi sürətlə artan türkdilli respublikalardan biridir. Ölkədə əhali daha çox türklərin, xüsusən də qazaxların və özbəklərin hesabına artır. Sürətli artım sayəsində Qazaxıstanda rusların əhali sayında payı azalır. 

1970-ci ildə Qazaxıstanda 11,6 milyon əhali olub və onların 42,8 faizi ruslar, 32,4 faizi qazaxlar, 7,2 faizi ukraynalılar, 6,5 faizi almanlar, 1,6 faizi özbəklər idi. 

2021-ci ildə əhali sayı 17,7 milyona çatıb. Əhalinin 70,4 faizi qazaxlardan, 15,5 faizi ruslardan, 3,2 faizi özbəklərdən, 2 faizi ukraynalılardan, 1,2 faizi almanlardan ibarət olub.

2023-cü ilin əvvəlinə aid olan son məlumata əsasən, Qazaxıstan əhalisinin 70,7 faizini (14,07 milyon) qazaxlar, 15,2 faizini (3 milyon) ruslar, 3,3 faizini (657 min) özbəklər, qalanını digər millətlərin nümayəndələri təşkil edir. 

Qeyd edək ki, Qazaxıstanda türklərin sayının artması böyük əhəmiyyət kəsb edir. Daha çox əhali həm ölkə ərazisində məskunlaşma vəziyyətini yaxşılaşdırır, həm də dövlətin milli təhlükəsizliyini gücləndirir. 

Vasif