Rusiya növbəti dəfə nüvə silahı ilə hədələdi – “Qərbə də elə bu lazımdır”

Rusiyanın müdafiə naziri Sergey Şoyqu 10-cu Syanşan Təhlükəsizlik Forumunda çıxışı zamanı nüvə müharibəsi ehtimalının artdığını deyib:

“Qərbin müntəzəm şəkildə Rusiya ilə münasibətləri gərginləşdirmək səyləri nüvə gücləri arasında hərbi toqquşma təhlükəsi daşıyır və fəlakətli nəticələr vəd edir”.

Bundan əvvəl Rusiya Prezidenti Vladimir Putin və Rusiya Təhlükəsizlik Şurasının sədr müavini Dmitri Medvedev də lazım olacağı təqdirdə nüvə silahından istifadə ediləcəyini bildiriblər.

Bununla bağlı Sfera.az-a açıqlama verən siyasi şərhçi Kənan Novruzov deyib ki, nüvə müharibəsi ehtimalı hər ötən gün artır və bunun əsas səbəbi Rusiyanın imkanlarının getdikcə tükənməsidir:

“Qərb Rusiyanı tədricən “dalana dirəyir”. Ukraynadakı müharibənin yaxın vaxtda başa çatacağı ağlabatan görünmür. Bu isə o deməkdir ki, Rusiyanın başı hələ çox ağrıyacaq. Davam edən müharibəyə təkcə hərbi konteksdən yanaşmaq doğru olmaz. Məsələ ondan ibarətdir ki, Rusiya iqtisadi sanksiyalar altında getdikcə sıxılır. Üstəgəl, Rusiya sivil dünyadan təcrid olunur, müttəfiqləri ilə münasibəti pisləşir. Daxildə hakimiyyət əleyhinə narazılıq da artır. Bu, sözsüz ki, 2024-cü ildə Rusiyada keçirilməsi nəzərdə tutulan prezident seçkilərində Putinin şanslarını xeyli azaldır”.

Ekspert bildirib ki, savaş başa çatana qədər Rusiya ən azı taktiki nüvə silahından istifadə edəcək: “Qərbə lazım olan da elə budur. Bundan sonra bir mübaliğə ilə desək, yer yerindən oynaya bilər”.

Günay