“Dünya “Həmas” qruplaşmasına münasibətdə ikiyə ayrılıb. Bir qrup ölkə “Həmas”ı terrorçu qruplaşma kimi dəyərləndirir, digərləri isə bu təşkilatı Fələstin uğrunda mübarizə aparan savaşçı kimi görür”.

Sfera.az bildirir ki, bunu politoloq Elxan Şahinoğlu deyib. O qeyd edib ki, “Həmas” qruplaşmasının təmsilçiləri Ankara, Moskva və Pekində görüşlər keçirir, Qətərdən və İrandan maliyyə əldə edirlər:

““Həmas” təmsilçiləri ilə dialoq siyasəti yalnız Rusiyaya aid deyil. “Həmas” qruplaşmasının nümyəndələri tez-tez Türkiyəyə səfər edir, diplomatlarla müzakirələr aparırlar. Təsadüfi deyil ki, Türkiyə prezidenti Rəcəb Tayyib Ərdoğan “Həmas” üzvlərini “mücahidlər” adlandırıb. Bundan sonra İsrailin Türkiyə səfirliyindəki diplomatları ölkələrinə geri çağırılıblar. Pekinin də “Həmas” qruplaşması ilə təmasları mövcuddur. Son hadisələrə qədər Pekin İsraillə Fələstin arasında vasitəçi olmaq istəyirdi. Lakin hazırkı şərtlər altında İsrailin Çinin vasitəçiliyinə razılaşması çətindir”.

Ekspert bildirib ki,  Pekinin nə İrana, nə də “Həmas” qruplaşmasına təsir etmək fikri var:

“Əksinə, Pekin də Moskva kimi ABŞ-nin Yaxın Şərqdə problemlərinin artmasında maraqlıdır. Bu ölkə üçün önəmli olan şey  sözügedən hadisələr fonunda Vaşinqtonun zəifləməsidir”.

Türkan