“Bayraktar”ın "TB3" modeli hazırlanır – Yeni PUA digərindən nə ilə fərqlənəcək?
“Baykar” şirkətinin direktorlar şurasının sədri Selçuk Bayraktar “Bayraktar TB”nin yeni modelinin hazırlandığı haqqında açıqlama verib.
Sfera.az “Bloomberg”ə istinadən xəbər verir ki, S.Bayraktar açıqlamasında yeni modelin "TB3" adlanacağını və onun "TB2" modelindən üstün texniki imkanlara sahib olacağını qeyd edib.
S.Bayraktar deyib ki, "TB2" modeli hərbi əməliyyatlarda yaxşı nəticələrə sahibdir. Onun verdiyi məlumata görə, pilotsuz uçuş aparatı (PUA) olan "TB2" modelli 27 min fut (8 230 metr) yüksəkliyə qalxa, 20 saat fasiləsiz uça, 100-120 kq ağırlığında silah daşıya bilir.
Şirkətin rəhbəri məlumat verib ki, PUA-lar arasında hərbi əməliyyatlar zamanı ən çox hava hücumundan müdafiə sistemi və tank məhz "TB2"lər vasitəsilə vurulub.
İndiyə qədər istehsal edilən "TB2" modellərinin sayının 500-ü keçdiyini deyən Bayraktar son 20 ildə şirkət gəlirlərinin 82 faizinin ixrac hesabına təmin edildiyini vurğulayıb. O şirkətin istehsal göstəricilərinin son bir ildə 50 faiz artdığını və TB2 modelinin istehsal, həmçinin ixrac göstəricilərinin yaxşılaşmasında mühüm rol oynadığını da qeyd edib.
S.Bayraktar söyləyib ki, bu günə qədər 31 ölkəyə "TB2" ixrac olunub. Onun bildirdiyinə görə ən böyük ixrac Səudiyyə Ərəbistanına həyata keçiriləcək. Bu ölkə ilə 3 milyard dollar dəyərində müqavilə bağlanıb.
"TB2"nin praktik əhəmiyyətini nəzərə alan şirkət “Bayraktar TB3” modelinin istehsalına hazırlaşır. S.Bayraktar "TB3" modelinin 2024-cü ildə hazır olacağını söyləyib. Onun sözlərinə görə "TB3" modeli "TB2" modeli ilə müqayisədə daha yüksəyə qalxa biləcək, daha uzun müddət havada qalacaq və ən önəmlisi daha çox yük qaldırma qabiliyyətinə sahib olacaq. "TB3"lər birdəfəyə 1900 km məsafəni qət edə biləcək. Bunlardan başqa "TB3" müstəqil şəkildə təyyarə daşıyan gəmilərə enib-qalxma imkanına malik olacaq.
Bayraktar xatırladıb ki, 2024-cü ildə reaktiv mühərrikə sahib pilotsuz döyüş təyyarəsi “Kızılelma”nın da kütləvi istehsalına başlanılacaq.
Şirkət bu iki PUA ilə ixrac bazarlarını genişləndirməyi düşünür.
Vasif
