Amsterdamdan vurulmuş “Boeing 777”nin bir parçası Rusiyada satışa çıxarıldı
Rusiyanın “Avito” onlayn elanlar xidmətində vurulmuş Malayziya “Boeing”in bir hissəsi 10 min rubla satışa çıxarılıb. Açıqlamada təyyarənin qalıqları “Amsterdamdan suvenir” adlandırılıb.
Sfera.az bildirir ki, elanın müəllifinin dediyinə görə, “Boeing”in bir parçasını o, Qrabovo kəndindəki nənəsinin bağında tapıb. Təyyarə bu yaşayış məntəqəsi üzərində vurulub.
Satıcı həmçinin iddia edir ki, o, dağıntıları toplayan ATƏT missiyasında çalışıb.
Xatırladaq ki, MH17 reysi ilə Amsterdamdan Kuala-Lumpura uçan Malayziyanın “Boeing 777” təyyarəsi 2014-cü il iyulun 17-də Donetsk yaxınlığında qəzaya uğrayıb. Təyyarədə olan 298 nəfərin hamısı həlak olub.
Kiyev qəzaya görə Rusiya Silahlı Qüvvələrini günahlandırıb, onlar belə bir hündürlükdə təyyarəni vurmağa imkanlarının olmadığını bildiriblər.
Hollandiya Baş Prokurorluğunun rəhbərlik etdiyi beynəlxalq istintaq qrupu qəzanın baş vermə şəraitini araşdırıb və belə nəticəyə gəlib ki, “Boinq” Rusiyaya məxsus və Rusiyadan tədarük edilən “Buk” zenit-raket kompleksi ilə vurulub. Bellingcat da daha əvvəl eyni nəticəyə gəlmişdi.
Qurbanların sayı baxımından ABŞ-da 11 sentyabr 2001-ci il terror aktlarını nəzərə almasaq, “Boeing 777” qəzası Ukrayna tarixində və ümumilikdə 21-ci əsrdə ən böyük qəza olub.
Təyyarənin vurulması Qərb dövlətləri tərəfindən Rusiya Federasiyasına qarşı yeni beynəlxalq sanksiyalar dalğasına səbəb olub. Bir çox ekspertlər bunu Rusiyanın ABŞ, Aİ və müttəfiqləri ilə münasibətlərində “dönüş nöqtəsi” hesab edir.
Aynil
Sfera.az
