Ermənistanda qadınlar ordu sıralarına qoşulacaq - Paşinyan AÇIQLADI

Ermənistanda könüllü olaraq xidmətə yazılan qadınlar qarşıdan gələn qış çağırışı zamanı Silahlı Qüvvələrin sıralarına qoşulacaqlar. 

Sfera.az xəbər verir ki, bu barədə Ermənistanın Baş naziri Nikol Paşinyan hökumətin iclasında bildirib.

Bundan sonra Ermənistanın müdafiə naziri Surek Papikyan qış çağırışı zamanı 18-27 yaşlı qadın nümayəndələri çağırmağa hazır olduqlarını deyib.

Buna cavab olaraq Baş nazir diqqəti qış çağırışına yönəltməyi təklif edib. Onun sözlərinə görə, çağırışçıları qadın və kişiyə bölməyə ehtiyac yoxdur, onların hamısı əsgər sayılmalıdır.

O bildirib ki, Müdafiə Nazirliyi qadın batalyonu üçün daimi fəaliyyət göstərən məntəqənin tikintisini yekunlaşdırır.

N.Paşinyan qadınların patrul xidmətinə cəlb edilməsində problemlərin olduğunu xatırladıb. Ona görə də qərara alınıb ki, yaxın vaxtlarda vakant vəzifələr yalnız qadınlar tərəfindən tutulsun.

Xatırladaq ki, iyunun 26-da Ermənistan parlamenti növbədənkənar iclasında qadınların könüllü olaraq hərbi xidmətə çağırılması sisteminin tətbiqini nəzərdə tutan qanun layihəsini qəbul edib.

Qeyd edək ki, qadınlar üçün icbari xidmət müddəti altı ay olacaq, bundan sonra onlar 2,5 min ABŞ dolları məbləğində ödəniş alacaqlar. 

Əzizə