Liviyada daşqınlar nəticəsində itkin düşənlərin sayı 10 minə çatıb.

 

Sfera.az xəbər verir ki, bunu sentyabrın 12-də Beynəlxalq Qızıl Xaç Komitəsinin (BQXK) nümayəndəsi Tamer Ramazan bildirib.

 

Liviyada bir çox yaşayış binaları, xəstəxanalar və infrastruktur su altında qalıb. İki bəndin dağıldığı və fəlakətli vəziyyətin yarandığı Derna şəhəri daha çox zərər çəkib. 

 

Beynəlxalq Qızıl Xaç və Qızıl Aypara Cəmiyyətləri Federasiyasının (IFRC) nümayəndə heyətinin rəhbəri Tamer Ramazan jurnalistlərə deyib: "Biz müstəqil məlumat mənbələrimizdən təsdiq edə bilərik ki, itkin düşənlərin sayı hazırda 10 minə çatır".

 

Təkcə Derna şəhərində ən azı 1000 cəsəd tapılıb və rəsmilər "Daniel" fırtınasının ölkəni bürüdükdən sonra ölənlərin sayının daha çox olacağını gözləyirdilər.

 

Jurnalistlər təxminən 125 min sakinin yaşadığı sahil şəhəri olan Dernaya gedərkən yol kənarlarında aşmış avtomobilləri, yıxılan ağacları və su basmış evləri görüblər.

 

"Dernadan qayıdırıq. Fəlakət dəhşətlidir. Cəsədlər hər yerdə - dənizdə, dərələrdə, binaların altında yatır"- mülki aviasiya naziri və administrasiyadakı fövqəladə hallar komitəsinin üzvü Hişem Əbu Çkivat deyib.

 

"Dernada tapılan cəsədlərin sayı 1000-dən çoxdur. Şəhərin 25%-i yox olub desəm, şişirtməmiş olaram. Əksər binalar uçub".

 

Liviyada baş verənlər

 

Sentyabrın 10-da "Daniel" siklonu Liviyanın şimal-şərqini vurub və Aralıq dənizi sahillərindəki şəhərlərə fırtınalı küləklər və tufanlarla birlikdə leysan gətirib. 

 

 

Liviya Səhiyyə Nazirliyinin son məlumatlarına görə, Liviyanın şimal-şərq bölgələrini vuran yağış və daşqınlar nəticəsində ölənlərin sayı 3 minə çatıb.

 

 

Liviya siyasi cəhətdən Şərq və Qərb arasında bölünüb və hökumət xidmətləri 2011-ci ildə baş verən və illərlə qarşıdurmalara səbəb olan qiyamdan sonra iflasa uğrayıb.

 

 

Tripolidəki beynəlxalq səviyyədə tanınan hökumət şərq bölgələrinə nəzarət etmir, lakin çərşənbə axşamı qərbi Misrata şəhərindən ən azı bir yardım reysi ilə Dernaya yardım göndərib. Digər ölkələr, o cümlədən ABŞ da yardım edəcəklərini bildiriblər.

 

Sfera.az