“Priqojinlə fotomu görəndə şok oldum, sonra yadıma düşdü ki...” – Corc Buşu təəccübləndirən FOTO

ABŞ-nin sabiq prezidenti Corc Buşun “Vaqner”in rəhbəri Yevgeni Priqojinlə olan fotosu özünü də təəccübləndirib.

Sfera.az bildirir ki,  o, bu barədə Yalta Avropa Strategiyası konfransında çıxış edərkən danışıb.

“Priqojinin təyyarə qəzasında ölüm xəbəri sizi şoka saldımı?” sualını cavablandıran Buş bunları deyib: “Xeyr. Amma məni şoka salan bir foto oldu, onu mənə dünən göstərdilər. 17 il bundan əvvəl Sankt-Peterburqda keçirilən G8 sammitində çəkilmiş şəkil idi. Orada Priqojin mənə yemək verirdi. O, Putinin aşpazı imiş”, - deyə keçmiş prezident gülümsəyərək söyləyib.

Buş Priqojinlə şəxsən görüşməsi ilə bağlı hər hansı xatirəsinin olmadığını bildirib və  “bircə onu bilirəm ki, sağ qalmışam”, deyə əlavə edib.

Qeyd edək ki, sözügedən foto 14 iyul 2006-cı il tarixinə aiddir. Fotoda Buş və həyat yoldaşı Laura Putinlə nahar edərkən Priqojin onlara içki təqdim edir.

Günay Rəsulqızı