Şimali Koreya lideri Kim Çen İn artıq Rusiyadadır. Onun Putinlə görüşü nəzərdə tutulur. Rusiya Prezidentinin mətbuat katibi Dmitri Peskov da məlumatı təsdiqləyib.

“Mən təsdiq edirəm. Bu, həqiqətən də belədir”, - o, qeyd edib.

Putin-Kim görüşünün nəticələri nələr ola bilər?

Bununla bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov deyib ki, Şimali Koreya liderinin Rusiya səfəri əvvəldən planlaşdırılmışdı:

“Tərəflər arasında iqtisadi, siyasi, hərbi sahədə əməkdaşlıq var. Son dövrlər Ukrayna müharibəsi ilə əlaqədar Rusiyanın silah ehtiyacı yarananda bəzi artilleriya qurğularını, raket sistemlərini Şimali Koreyadan alır. Artıq bu, yayılan bəzi məlumatlarda da öz əksini tapıb. Bunun nə dərəcədə doğru olması ilə bağlı isə dəqiq informasiyalar yoxdur. Hər halda hər iki ölkə arasında az da olsa silah mübadiləsi mövcuddur. Yəqin ki, bu proses davam edəcək”.

Müsahibimiz xatırladıb ki, Şimali Koreya uzun illərdir, sanksiyalarla yaşayan dövlətdir:

“Onların əsas ticarət ortaqları Çin, Rusiya, Hindistan kimi ölkələrdir. Görünür, Rusiya ilə əlaqələrin daha da dərinləşdirilməsi planlaşdırılır. Rusiya artıq Qərblə mümkün ticarət münasibətlərini Şimali Koreya, Çin və digər ölkələrlə əvəz etməyə çalışacaq. Güclü ticarət dövriyyəsinin olacağı, nəticələrin inkişaf edəcəyi isə inandırıcı görünmür”.

Günay Rəsulqızı