Priqojinin ölümü ilə bağlı iddialar – Onu kim öldürə bilərdi?
“Vaqner” özəl hərbi şirkətinin rəhbəri Yevgeni Priqojinin ölümü dünya mediasının gündəmindən düşmür.
Sfera.az bildirir ki, bununla bağlı fərqli iddialar səsləndirilir. “Vaqner”lə əlaqəli "Grey Zone" adlı “Telegram” kanalı təyyarənin Rusiya ordusu tərəfindən vurulduğu fikrini irəli sürüb. Bununla yanaşı, “Vaqner” üzvləri qisas alacaqlarına and içdikləri videonu da paylaşıblar. Videoda maskalı şəxslər bunları deyib:
“Hazırda bizim nə edəcəyimiz barədə çoxlu söhbətlər gedir. Sizə bircə söz deyə bilərik: Başlayırıq, hazırlaşın, bizi gözləyin!”.
“Vaqner”ə bağlı olan digər “Telegram” kanalları da Priqojinin ölümü təsdiqlənərsə, Kremli ələ keçirəcəklərini vəd ediblər. Paralel olaraq muzdlu qrupun Sankt-Peterburqdakı qərargahında Priqojin və Utkin üçün xatirə guşəsi yaradılıb.
Vaşinqtonda yerləşən Müharibənin Tədqiqi İnstitutu isə iddia edib ki, Putin Rusiya hərbi rəhbərliyinə Priqojinin təyyarəsini vurmağı əmr edib: “Təyyarənin qəzaya uğramasının arxasında Rusiya kəşfiyyat xidmətinin dayandığına dair iddialar da var”.
Bu arada, bütün faktlara baxmayaraq, çoxları Priqojinin öldüyünə hələ də inanmır. Bunun ən böyük səbəblərindən biri də onun 2019-cu ildə də oxşar hadisə ilə qarşılaşmasıdır. Belə ki, “Vaqner” liderinin 2019-cu ildə Konqoda qəzaya uğrayan təyyarədə öldüyü xəbəri yayılsa da, Priqojin 3 gün sonra ortaya çıxıb.
Qeyd edək ki, Rusiya Prezidenti Vladimir Putin ötən gün Tver vilayətində baş verən təyyarə qəzasında həlak olanların ailələrinə başsağlığı verib.
“İstintaq Komitəsi hadisə ilə bağlı ilkin araşdırmaya başlayıb. Proses tam şəkildə həyata keçiriləcək və sona çatdırılacaq. Burada heç bir şübhə yoxdur. Görək, yaxın vaxtlarda müstəntiqlər nə deyəcək. İndi isə ekspertiza aparılır. Bu, bir qədər vaxt aparır”, deyə Putin söyləyib.
Günay Rəsulqızı
