Ukrayna ordusunun bu silahlara ehtiyacı var - Ekspert açıqladı

Ukraynanın Ordu Tədqiqatları, Konversiya və Silahsızlaşdırma Mərkəzinin direktoru Valentin Badrak Ukrayna ordusunun ehtiyac duyduğu silahların adlarını açıqlayıb. Onun sözlərinə görə ordunun daha çox uzaqmənzilli raketlərə ehtiyacı var.

Sfera.az UNİAN-a istinadən xəbər verir ki, Badrak Ukrayna ordusunun 300-400 kilometr mənzilli raketlərlə təmin edilməsinin əhəmiyyətini vurğulayıb. O bu cür raketlərin müttəfiq ölkələrdə kifayət qədər olduğunu deyib: "Məsələn, Almaniyanın özündə 600-ə yaxın "Taurus" raketi var. Almanlar bu raketlərdən 100 ədədini və ya bir qədər çoxunu bizə verə bilər. ABŞ-nin ATACMS raketləri də texniki cəhətdən əlverişlidir. Konqres razılıq verərsə, ABŞ 80-100 ədəd ATACMS raketini Ukraynaya verəcək. Bizin Böyük Britaniyanın “Storm Shadow” və fransızların SCALP raketlərinə də ehtiyacımız var”.

Onun sözlərinə görə bu cür raketlərin vasitəsilə düşmənin maddi-texniki təminat zəncirini kəsmək və Rusiyaya təzyiqi artırmaq mümkündür.

Badrak Ukraynanın effektiv hücumu üçün döyüş aviasiyasının da böyük rol oynadığını söyləyib. O “F-16”ların bu baxımdan Ukrayna ordusuna böyük köməyinin olacağını deyib: “Müharibədə döyüşləri aktivləşdirmək üçün döyüş təyyarələri vacibdir. Ukrayna ABŞ və digər müttəfiqlərindən “F-16”lar, Avstraliyadan “F-18”lər, İsveçdən isə “Gripen” markalı döyüş təyyarələri almağa çalışır. Bundan əlavə, Ukraynaya həm də pilotsuz təyyarələr lazımdır. Təkcə kəşfiyyat və zərbə endirən pilotsuz təyyarələr deyil, həm də bir neçə min kilometr uça bilən uzun mənzilli kamikadze dronlarına ehtiyacımız var.

Bizə təkcə havada hərəkən edən dronlar deyil, həm də yerüstü və sualtı pilotsuz hücum vasitələri lazımdır. Daha çox əsgər itkisinin qarşısını almaq üçün robot döyüş vasitələrinə ehtiyacımız çoxdur. Düşmənin texnikasını və canlı qüvvəsini müstəqil şəkildə məhv edəcək ucuz vasitələrin əhəmiyyətini görürük. Bu cür çoxlu texniki vasitələr əldə etməliyik”.

Badrak onu da əlavə edib ki, Ukraynaya çoxlu sayda elektron döyüş texnikası, minatəmizləmə avadanlığı və artilleriya üçün sursat lazımdır.

Qeyd edək ki, bu yaxınlarda Qərb ölkələrindən Ukraynaya “F-16” qırıcılarının tədarükü ilə bağlı xəbərlər yayılmağa başlayıb. Danimarka 19 ədəd, Hollandiya 42 qırıcı verəcək. Norveç də Ukraynaya qırıcılar vəd edib, Portuqaliya isə “F-16”nı idarə etmək üçün ukraynalı pilot və mühəndislərə təlim keçəcəyini açıqlayıb.

Vasif