ABŞ Hərbi Dəniz Qüvvələrinin iki üzvü Amerika Birləşmiş Ştatlarında gizli milli təhlükəsizlik məlumatlarını Çinə ötürməkdə ittiham olunaraq saxlanılıb.

Sfera.az bildirir ki, ABŞ hərbi qulluqçuları ABŞ-ın milli təhlükəsizliyi ilə bağlı məxfi məlumatları əks etdirən fotoşəkillər və videolar üçün bir neçə min dollar almaqda ittiham olunurlar.

Məlumata görə, kiçik zabit Wenheng Zhao məxfi hərbi məlumatları ehtiva edən foto və videolar müqabilində təxminən 15 min dollar alıb. O, ABŞ hərbi təlimlərinin planlarını, ABŞ-ın Yaponiyadakı hərbi bazasındakı radar sisteminin çertyojlarını və ABŞ Hərbi Dəniz Qüvvələri ilə bağlı digər məlumatları Çin idarəçisinə göndərib.

Seylor Jinchao Wei minlərlə dollar müqabilində ABŞ milli müdafiə məlumatlarını Pekinə ötürməkdə ittiham olunur. Söhbət Amerika döyüş gəmiləri, xüsusən də onun xidmət etdiyi USS Essex desant gəmisi haqqında məlumatdan gedir.

Hər iki hərbçi sui-qəsd və rüşvət almaqda ittiham olunur. Baş prokuror Mett Olsenin sözlərinə görə, onların əməlləri nəticəsində, Çin məxfi hərbi məlumat alıb.

FBİ-nin xüsusi agenti Steysi Moy: “ABŞ üçün Çindən daha böyük təhlükə yoxdur”- deyə bildirib.

Xatırladaq ki, xəbər verdiyimiz kimi, Çin qalliumu olmadan ABŞ hərbi sənayesi hərbi texnika və radarlar istehsal edə bilməz. Bununla bağlı Pentaqon ilin sonuna qədər qalliumun tədarükü üçün Amerika və ya Kanada şirkətləri ilə ilk müqavilə bağlamağı planlaşdırır.

İyulun 20-də Çin sədri Si Cinpin ABŞ-ın keçmiş dövlət katibi Henri Kissincerlə görüşüb. Jurnalistlərin fikrincə, Kissincer Çinə şəxsi səfərlə gəlib, lakin o, ABŞ-Çin danışıqları üçün yan keçid kanalı kimi çıxış edə bilər.

Aysel

Sfera.az