İsrailli arxeoloqlar 2500 illik yaşı olan qeyri-adi qəbirlərdə onlarla skelet aşkar ediblər - Fotolar

İsrailin cənubundakı Negev səhrasında yerli arxeoloqlar təxminən 2500 il yaşı olan və içərisində 50 skeletin olduğu qədim qəbirlər aşkar ediblər. Araşdırmalara görə, bu skeletlər, köləliyə satılan qadınlara aid ola bilər.

Sfera.az bildirir ki, arxeoloqlar qeyri-adi qəbirlərdə aşkar edilən skeletlərin insan alverinin qurbanı olmuş qadınlara aid ola biləcəyinə inanırlar. Negev səhrasındakı qədim məzarların çoxu yuvarlaqdır. Alimlər bildirirlər ki, indi aşkar edilmiş iki yeni məzar isə unikal şəkildə kvadratdır. Qəbirlərdən birinin ölçüsü 7 ilə 7 metr, ikincisi isə 4,5 ilə 4,5 metrdir. Lakin onların yerləşdiyi yer də alimləri təəccübləndirir. Arxeoloqların fikrincə, ərazidə heç vaxt belə qəbirlərə rast gəlinməyib və onların heç bir məlum yaşayış yeri ilə əlaqəsi yoxdur.

Hər iki qədim məzarlıq minlərlə il əvvəl Misirdən İordaniyaya və Ərəbistan yarımadasına aparan iki ticarət yolunun kəsişməsində yerləşir. Yeni araşdırmanın müəllifləri qeyd edirlər ki, insanların ticarət yollarının kəsişməsində basdırılması qeyri-adi deyil, çünki bu sərt səhrada insanlar tez-tez xəstəlikdən və zorakı ölümdən ölüblər. Digər tərəfdən, qədim zamanlarda yol ayrıcları ritual və dini əhəmiyyətə malik bir növ müqəddəs yerlər hesab olunurdu. Alimlər qazıntılar zamanı eramızdan əvvəl 7-ci əsrdən eramızdan əvvəl 5-ci əsrə qədər yaradılmış bir çox qədim artefakt aşkar ediblər. Bütün artefaktlar müxtəlif yerlərdə yaradılmışdır: Levantın cənubunda (Şərqi Aralıq dənizi), Ərəbistan yarımadasının cənubunda və Misirdə. Alimlər hesab edirlər ki, qəbirlərdən tapılan 50 skelet dini ayinlər zamanı sonrakı istifadə üçün köləliyə satılaraq Ərəbistan yarımadasına aparılan yetkin qadınlara aid ola bilər.

Baxmayaraq ki, bu fikri təsdiqləmək üçün əlavə dəlillərə ehtiyac var. Alimlər qəbirlərdə misirlilərin qoruyucu gözmuncuğu kimi istifadə etdikləri zinət əşyaları, eləcə də digər bölgələrə aid müxtəlif artefaktlar aşkar ediblər. Buna görə də alimlər Misirdə qadınların köləliyə satılaraq yeni həyat yerinə aparıldığına inanırlar. Qəbirlərdən birində Ərəbistan yarımadasının cənubunda hazırlanmış alebastrdan hazırlanmış buxur qabı tapılıb. Həmçinin qəbirlərdə misirlilərin amulet kimi istifadə etdikləri zinət əşyaları aşkar ediblər. Alimlərin fikrincə, qəbirlərdəki bəzi skeletlərin vəziyyəti onların əlavə qalıqlara yer açmaq üçün ilkin yerlərindən köçürüldüyünü göstərir. Bu onu göstərir ki, bu qəbirlər uzun müddət insanların dəfn edilməsi üçün istifadə oluna bilərdi.

Arxeoloqlar bu qəbirlər haqqında və burada əslində kimin dəfn edildiyi haqqında daha çox məlumat əldə etmək üçün onları daha da araşdıracaqlar.