“Washington Post” qəzetinin “Vaqner” muzdlu qrupu ilə bağlı yayımladığı son məlumat səs-küyə səbəb olub.

Sfera.az bildirir ki, nəşr ABŞ-nin Priqojinin Rusiyada silahlı aksiya planlaşdırdığından xəbərdar olduğunu iddia edib. Nəşr “ABŞ kəşfiyyatçıları Priqojinin iyunun ortalarında Rusiyada üsyana hazırlaşdığını öyrəniblər” başlığı ilə oxucularının qarşısına çıxıb. Məlumata görə, ABŞ kəşfiyyatı dərhal Ağ Evə və digər dövlət qurumlarına məlumat verib.

Nəşrin iddiasına görə, ABŞ nə olacağını günlər öncədən bilib. Anonimlik şərti ilə danışan bir ABŞ rəsmisi “rəhbərliyə nəyinsə baş verdiyini bildirmək üçün kifayət qədər siqnallar var idi. Ona görə də düşünürəm ki, onlar buna hazır idilər”, deyə qəzetə açıqlama verib.

“Washington Post” başqa bir xəbərdə “Vaqner” üsyanının iflasa uğradığını, lakin son 24 saat ərzində baş verən hadisələrin təhlükəsizlik sahəsində zəiflikləri ortaya çıxardığını və Putinin imicinə xələl gətirdiyini yazıb.

“New York Times” qəzetinin kəşfiyyat mənbələrinə əsaslanan xəbərinə görə də “Vaqner” və onun lideri Priqojinin bu cəhdi barədə ABŞ rəsmiləri məlumatlandırılıb. Qeyd olunub ki, Pentaqon bu addımın Moskvanın nüvə silahı arsenalına nəzarətinə necə təsir edəcəyindən narahat olub.

Günay Rəsulqızı