1912-ci ildə Atlantik okeanında batan "Titanik" gəmisinin qalıqlarını izləmək üçün ekspedisiyaya çıxan "Titan" batiskafı səfərə başladığı ilk saatlarda partlayıb. 

Sfera.az xəbər verir ki, bu haqda məlumatı “The Wall Street Journal” nəşri ABŞ Hərbi Dəniz Qüvvələrinin rəsmisinə istinadən yayıb. 

Nəşrə danışan yüksək rütbəli şəxs bildirib ki, onlar partlayışın səsini eşidiblər. Qəzet yazır ki, səs məxfi avadanlıqların köməyi ilə tanınıb. 

Yüksək rütbəli şəxsin sözlərinə görə, ABŞ ordusu "Titan" ilə əlaqə kəsildikdən dərhal sonra axtarışlara başlayıb. Mənbə bildirib ki, onlar düşmən sualtı qayıqlarını aşkar etmək üçün nəzərdə tutulmuş gizli sistem vasitəsilə axtarış aparıblar. Qəzet bildirir ki, bu sistemin adı milli təhlükəsizlik baxımından açıqlanmır. 

Dalışın başlamasından bir neçə saat sonra sistem, ehtimal ki, sualtı qayığın qalıqlarının tapıldığı yerin yaxınlığında partlayış səsini qeydə alıb. 

“OceanGate” şirkətinin “Titan” batiskafı iyunun 18-də, Atlantik okeanında “Titanik”in qəzaya uğradığı yerə dalmağa başlayandan təxminən iki saat sonra radarlardan itib. 

Batiskafda beş nəfər olub. Onlar britaniyalı milyarder və səyyah 58 yaşlı Həmiş Hardinq, pakistanlı və britaniyalı iş adamı 48 yaşlı Şahzadə Davud və onun 19 yaşlı oğlu Süleyman, “OceanGate”in baş direktoru 61 yaşlı Stokton Raş və cihazın pilotu, keçmiş hərbi dalğıc, "Titanik" tədqiqatçısı 77 yaşlı fransız Pol-Henri Narjolet olublar.

Vasif