Ukrayna hərbi əməliyyatları Rusiya ərazisinə keçirib. Son məlumatlara görə, onlar Belqorod şəhərində uğurlu əməliyyatlar apararaq nailiyyətlər əldə edirlər.

Bununla bağlı Sfera.az-a danışan politoloq Məhəmməd Əsədullazadə deyib ki, artıq Ukrayna Baxmutun müdafiəsindən geri çəkilərək, müharibəni Rusiyanın içərilərinə daşımaq niyyətindədir:

“Onlar uğurlu hərbi əməliyyatlarla Kremli pat vəziyyətə salır, Rusiyanın müdafiə və hücum planlarının qarşısını alırlar. Sözügedən vəziyyət isə Ukraynanın əks-hücumlarının effektli olmasını təmin edir. Ukrayna Rusiya ərazilərini zəbt etməklə onları öz torpaqlarından çıxmasına məcbur edəcək. Bu uğurlu hərbi əməliyyatlar Rusiyanın geniş ərazilərinin Ukrayna tərəfindən nəzarətə alınması ilə nəticələnə bilər”.

Ekspert deyib ki,  Moskva müqavimət göstərmək və qarşı tərəfin irəliləyişini dayandırmaq üçün Ukrayna ərazisindən qoşunlarını çıxarmalıdır:

“Görünür, Volodimir Zelenskinin Qərb səfərində düşmənin küncə sıxışdırılması üçün hərbi əməliyyatların Rusiya ərazisinə keçirilməsi məqbul bilinib. Bu hərbi əməliyyatlar müharibənin gedişatını Ukraynanın leyhinə dəyişəcək. Təbii ki, əməliyyatlar davamlı olarsa...”

Günay Rəsulqızı