Fransada son illərin ən böyük 1 May Əmək Günü yürüşləri zorakı hadisələrlə müşahidə olunub. 

Sfera.az xarici mediaya istinadən xəbər verir ki, etirazçılar Fransa Prezidenti Emmanuel Makrona qəzəblərini ifadə edərək aqressiv davranıblar. Molotov kokteyli ilə silahlanan etirazçıların bu cür davranışına qarşı polis gözyaşardıcı qazdan və rezin gülələrdən istifadə edib.

Kütləvi aksilarda bir etirazçının əlini itirdiyi, bir polis zabitinin isə molotof kokteyli ilə vurulduqdan sonra ciddi yanıq xəsarətləri aldığı bildirilir. 

Etirazların yenidən alovlanmasının səbəbi sadəcə 1 Mayla bağlı olmayıb. Aksiyaların güclənməsinə və aqressivliyin artmasına səbəb Fransada həyata keçirilən pensiya islahatı olub. 

Daxili İşlər Nazirliyinin verdiyi məlumata görə, Fransanın hər yerində təxminən 782 000 nəfər Fransa prezidentinin pensiya islahatına qarşı qəzəbini ifadə edib. Rəsmi məlumatlarda yalnız Parisdə 112 000 nəfərin etirazlara qoşulduğu təxmin olunur.

Həmkarlar ittifaqlarının məlumatında isə daha çox insanın etiraz aksiyalarına qoşulduğu bildirilir. Həmin məlumatlara əsasən, Parisdə 550 000 insan, bütün ölkə boyu 2,3 milyon insan etiraz aksiyalarında iştirak edib. 

Etiraz aksiyalarında bu qədər insanın iştirak etməsində həmkarlar təşkilatları arasında razılaşmaların böyük rolu olub. 2009-cu ildən bəri ilk dəfə olaraq həmkarlar ittifaqları 1 May Əmək Günü üçün bir araya gəliblər. 

Xatırladaq ki, Fransa hökuməti pensiya yaşını 62-dən 64-ə qaldırıb. 

Toqquşmaların ən pisi “Place de la Nation”da olub, burada etirazçılar “Velib” velosiped kirayəsi stansiyasını yandırıblar. Ölkədə ən azı 291, yalnız Parisdə 60-dan çox etirazçı həbs edilib. Məlumatlara görə, 108 polis və onlarla etirazçı yaralanıb, bəzilərinin vəziyyəti ağırdır. 

Polis ilk dəfə olaraq Fransanın paytaxtında və Bordoda problemli yerləri müəyyən etmək üçün dronları yerləşdirib. 

Vasif