Şimali Koreya lideri Kim Çen Inın bacısı Kim Yo Conq ABŞ və Cənubi Koreyanın son razılaşması ilə bağlı xəbərdarlıq edib.

Sfera.az bildirir ki, bu barədə “BBC” Şimali Koreyanın dövlət mediasına istinadən məlumat yayıb. “Düşmənlər nüvə müharibəsi təlimləri keçirməyə nə qədər çox hazır olsalar və Koreya yarımadasının yaxınlığında nə qədər çox nüvə aktivləri yerləşdirsələr, bizim özünümüdafiə hüququmuzun həyata keçirilməsi mütənasib olaraq güclənəcək”, deyə Kim Yo Cunq qeyd edib. O xəbərdarlıq edib ki, bu addım yalnız Şimal-Şərqi Asiya və ümumilikdə dünyanın sülh və təhlükəsizliyinin daha ciddi təhlükəyə məruz qalması ilə nəticələnəcək.

“BBC” həmçinin, Kim Yo Conqun Koreya İşçi Partiyasının Mərkəzi Komitəsində yüksək vəzifə tutduğunu və onun qardaşının fikirlərinə təsir etdiyini vurğulayıb.

Xatırladaq ki, Vaşinqton Cənubi Koreyaya Amerika nüvə sualtı qayıqlarını yerləşdirməyə və Seulun nüvə planlaşdırma əməliyyatlarına cəlb edilməsinə razılıq verib. Bunun müqabilində Cənubi Koreya öz nüvə silahını hazırlamamağa razı olub. Cənubi Koreya prezidenti Yoon Suk-yeolun sözlərinə görə, "Vaşinqton Bəyannaməsi" ABŞ-ın müdafiəsini gücləndirmək, hücumların qarşısını almaq və nüvə silahı ilə müttəfiqlərini qorumaq üçün mühüm öhdəliyi ifadə edir.  Bildirilir ki, həm ABŞ-da, həm də Cənubi Koreyada Şimali Koreyadan gələn nüvə təhlükəsi ilə bağlı narahatlıqlar artır. Pxenyan Cənubi Koreyanı vura bilən taktiki nüvə silahları və ABŞ ərazisinə çata bilən uzaqmənzilli silahlar hazırlayır. Birləşmiş Ştatların Cənubi Koreyanı müdafiə etmək üçün artıq müqavilə öhdəliyi var və lazım gələrsə nüvə silahından istifadə edəcəyinə söz verib, lakin Cənubi Koreyanın bəzi dairələrində bu öhdəliklə bağlı şübhələr yaranıb və ölkəni öz nüvə proqramını həyata keçirməyə çağırıb.

Günay Rəsulqızı