“Rusiya Ərdoğanın seçilməsini istəyir, Qərb isə...” - Açıqlama
“Türkiyədə prezident seçkiləri Qərb və Moskvada maraqla izlənilir. Rusiya hazırkı prezident Rəcəb Tayyib Ərdoğana, Qərb isə üstüörtülü şəkildə onun əsas rəqibi Kamal Kılıçdaroğluna üstünlük verir”.
Sfera.az bildirir ki, bu barədə “France 24” məlumat yayıb. Vaşinqtondakı Sent Lourens Universitetinin Türkiyə üzrə mütəxəssisi Hovard Eissenstat nəşrə açıqlamasında qeyd edib ki, Rusiya Ərdoğanın qələbəsinə ümid bəsləyir. Mütəxəssisin fikrincə, Türkiyə prezidentinin yenidən seçiləcəyi təqdirdə xarici siyasətində heç bir dəyişiklik olmayacaq.
Vaşinqtonda yerləşən Strateji və Beynəlxalq Araşdırmalar Mərkəzinin mütəxəssisi Cefrey Mankoff isə Putin və Ərdoğanın bir-birindən öz məqsədləri üçün istifadə etdiklərini vurğulayıb:
“Rusiya 2015-ci ildən bəri Ərdoğanı tərəfdaş kimi görür. Digər tərəfdən o, bir lider olaraq indi Qərbdə zərərli hesab olunur və bunun Rusiya üçün faydası var. Bir çox Qərb rəsmiləri və liderləri isə Ərdoğanla münasibətdə məyusluq hiss edirlər. Həmçinin Ərdoğan ağıllı siyasətçidir - ona görə də bütün baş verənlərə baxmayaraq yenidən seçilə biləcəyinə dair fikirlər var”.
“France 24”ə danışan analitiklərin fikrincə, seçkiləri sakitcə izləyən Avropa və ABŞ müxalifəti dəstəkləyir.
Günay Rəsulqızı