2023-cü ilin yanvar-fevral aylarında Rusiyaya şərab və sərt spirtli içkilərin idxalı illik müqayisədə 23 faiz artaraq 79 milyon litrə çatıb. Alkoqol idxalının ümumi həcmi son beş ilin rekord göstərici olub. 

Sfera.az “Kommersant”a istinadən xəbər verir ki, şərabların tədarükü 23 faiz artaraq 63,37 milyon litr, sərt spirtli içkilərin tədarükü 25 faiz artaraq 15,65 milyon litr olub.

Bu dövrdə viski idxalı 32 faiz artaraq 6,16 milyon litr, konyak və brendi 61 faiz artaraq 2,82 milyon litr, likör idxalı 60 faiz artaraq 2,01 milyon litr, rom 19 faiz artaraq 1,67 milyon litr təşkil edib. 

Rusiyalı ekspertlər deyir ki, spirtli içkilərin idxalının kəskin şəkildə artması daxili tələbdəki dəyişikliklə bağlı deyil. Ekspertlərin şərhinə görə 2022-ci ildə sanksiyalar səbəbindən lizinq xidmətlərində gecikmələr olduğundan ötən il idxalı nəzərdə tutulan malların alışı bu il həyata keçirilib. Buna görə də ilk 2 ayda spirtli içkilərin idxalında kəskin artım baş verib. 

Qeyd edək ki, Azərbaycan da Rusiyaya spirtli içki ixrac edən ölkələrdəndir. 2022-ci ilin məlumatına əsasən, Azərbaycandan Rusiyaya spirtli içki ixracı 2,832 milyon litr təşkil edib. Ölkəmizin ixracında şərab əsas məhsul olub.

Vasif