Makron fikirlərini müdafiə etmək üçün “ChatGPT”nin cavabından istifadə etdi
Fransa prezidenti Emmanuel Makron Avropanın "yıxıcı texnologiyalar" adlanan innovasiyalar qarşısında rəqabətə davamlı olmasının vacibliyindən danışıb.
Sfera.az xəbər verir ki, Makron bu istiqamətdəki fikirlərini “ChatGPT”nin verdiyi cavabla müdafiə edib.
Hollandiya səfərindən qayıdan Makron “ChatGPT”yə “bir sözlə, Avropa “yıxıcı innovasiyalar” mövzusunda necə mövqe tutur? sualını verib. O, süni intellekt botunun verdiyi "rəqabətlidir" cavabını “Twitter” hesabında paylaşıb. Dövlət başçısı paylaşıma "Avropa rəqabətlidir, hətta süni intellekt də bunu təsdiqləyir!" şərhini yazıb.
Avropanın “yıxıcı innovasiyalar” sahəsində sərmayə qoymağa və əməkdaşlığa davam etməsini tələb edən Makron, "Biz perspektivli şirkətlərlə ön sıralarda qala bilərik. Fransızlar və hollandlar olaraq bu yolda irəliləyirik", - deyib.
Fransalı “Twitter” istifadəçiləri isə ölkədəki pensiya islahatı müzakirələrinə və qeyri-qanuni immiqrantlarla bağlı yeridilən siyasətə diqqət çəkmək üçün ChatGPT-yə bu mövzularda verdikləri sualların cavablarını ehtiva edən şəkilləri paylaşıblar.
İstifadəçilərdən biri "Xülasə, Makronun 5 illik fəaliyyətini necə ümumiləşdirərdiniz?" sualına süni intellektin verdiyi "Mübahisəli" cavabını paylaşıb.
Qeyd edək ki, “ChatGPT” Fransada dezinformasiya və məlumat çirklənməsinə səbəb olması səbəbiylə Milli İnformatika və Azadlıqlar Komissiyası (CNIL) tərəfindən araşdırılır.
Lalə
Sfera.az