Rusiya Ukraynanın xarici işlər naziri Dmitri Kulebanın Qara dənizin NATO-nun dominantlıq etdiyi dənizə çevrilməli olduğu ilə bağlı açıqlamalarına reaksiya verib.

Sfera.az bildirir ki, Kremlin sözçüsü Dmitriy Peskov mövzu ilə bağlı sərt açıqlama verib.

"Qara dəniz heç vaxt NATO dənizi olmayacaq. Bu, ortaq dənizdir. Bütün sahilyanı ölkələr üçün əməkdaşlıq, qarşılıqlı fəaliyyət və təhlükəsizlik dənizi olaraq qalmalıdır", - Peskov deyib. 

NATO-nun Ukraynaya dəstəyini tənqid edən Peskov, "Qlobal müharibənin xətləri daha aydın oldu. NATO-nun münaqişədə iştirakı artıb", - deyə vurğulayıb. 

O, Çin və Tayvan arasındakı gərginlikdə ABŞ-ın Tayvana dəstəyini də tənqid edib. Peskov, bu cür təşəbbüslərin təxribat olduğunu söyləyib: “Tayvanla bağlı mövqeyimiz açıqdır. Biz digər ölkələrin vəziyyətin sabitliyini pozmaq cəhdlərini pisləyirik”.

Xatırladaq ki, Ukraynanın xarici işlər naziri Dmitri Kuleba onlayn olaraq qatıldığı Qara Dəniz Təhlükəsizlik Konfransında verdiyi açıqlamada, regionda təhlükə hiss edən bütün xalqlar üçün hərtərəfli təhlükəsizlik şəbəkəsinin yaradılmalı olduğunu bu sözlərlə ifadə edib: “Qara dənizi Baltik dənizi kimi NATO dənizinə çevirməyin vaxtı çatıb”.

Lalə
Sfera.az