Norveç administrasiyası Rusiyanın Oslodakı səfirliyinin 15 əməkdaşını “persona non qrata” elan edib.

Sfera.az xəbər verir ki, Norveç Xarici İşlər Nazirliyindən verilən açıqlamada Rusiyanın Oslodakı səfirliyindəki 15 əməkdaşın “diplomatik status” adı altında fəaliyyət göstərən kəşfiyyatçı olduğu açıqlanıb. 

Bildirilib ki, onlar barəsindəki qərar “artan kəşfiyyat təhlükəsi səbəbilə Avropada dəyişən təhlükəsizlik vəziyyəti”nə cavab olaraq qəbul edilib.

Norveçin xarici işlər naziri Anniken Huitfeldt keçirdiyi mətbuat konfransında bunları deyib:

 “15 kəşfiyyatçı diplomatik statuslarına uyğun gəlməyən fəaliyyətlə məşğuldur. Onların fəaliyyəti Norveç üçün təhlükə yaradır. Onların sayı Ukraynanın işğalından sonra artıb”.

Huitfeldt bildirib ki, sözügedən səfirlik əməkdaşlarına qısa müddətdə ölkəni tərk etmələri barədə göstəriş verilib. O qeyd edib ki, Norveç Rusiya ilə normal diplomatik münasibətlər saxlamaq istəyir.

Rusiya Xarici İşlər Nazirliyindən məsələ ilə bağlı verilən açıqlamada, Moskvanın Norveçin deportasiya addımına cavab verəcəyi bildirilib.

Lalə 
Sfera.az