“Finlandiyanın NATO-ya daxil olması Rusiyanı qıcıqlandırıb” - Açıqlama

“Finlandiyanın NATO-ya daxil olması ciddi nəticələrə səbəb olacaq”.

Sfera.az bildirir ki, bu barədə Çinin “Global Times” nəşri məlumat yayıb. Çinli analitiklərin fikrincə, sözügedən hadisədən sonra Rusiya öz sərhədlərinin təhlükəsizliyini gücləndirmək məqsədilə nüvə silahları yerləşdirəcək:

“Finlandiyanın NATO-ya daxil olmasından sonra Baltikyanı və Skandinaviya ölkələri ilə sərhədlərdə nüvə silahlarının yerləşdirilməsinin artması, eləcə də Avropanın ümumi təhlükəsizliyinin azalması müşahidə olunacaq”.

Ekspertlərin fikrincə, NATO raket buraxılış qurğularını Finlandiya ərazisinə yerləşdirmək niyyətindədir və bu, Moskvanın sərt reaksiyasına səbəb olacaq. Politoloq Cui Henq bildirib ki, Finlandiyanın neytrallıqdan tamamilə imtina etməsi bu ölkə üçün riskləri azaltmaq əvəzinə artırır.

“Rusiya bir tərəfdən Ukrayna münaqişəsi çərçivəsində hücumu gücləndirə, digər tərəfdən nüvə silahlarının yerləşdirilməsini artırmağa davam edə bilər”, deyə o əlavə edib.

Xatırladaq ki, ötən gün Finlandiya rəsmən NATO-ya üzv olub.

Günay Rəsulqızı