Rusiya-Ukrayna müharibəsinin başlanmasından 404 gün ötür. 

Sfera.az xəbər verir ki, Rusiya və Ukrayna arasında 13 aydır davam edən döyüşlərə danışıqlar yolu ilə son qoymaq mümkün olmayıb. Əksinə zamanla döyüşlərdə aktivliyin artdığı müşahidə edilir.  

Ukraynanın müdafiə naziri keçən həftə verdiyi açıqlamada apreldə əks-hücuma başlaya biləcəklərini söyləyib. Rusiyanın müdafiə naziri Sergey Şoyqu isə Ukraynada döyüşən Moskva qoşunlarının qərargahına səfəri zamanı Ukraynadakı Rusiya qüvvələrinə döyüş sursatlarının tədarükünü artıracağını vəd edib.
Ukrayna-Rusiya müharibəsi sadəcə döyüş meydanında getmir. Qərb-Rusiya qarşıdurması müxtəlif sahələrdə özünü biruzə verir. 

Ukrayna Rusiyanın BMT Təhlükəsizlik Şurasına aprel ayı üzrə sədrliyinə qarşı çıxıb. Kiyev şəhər məhkəməsi Rusiyanın işğalçı qüvvələrini tərifləməsi və dini təfriqələri qızışdırması səbəbindən dini liderə ev dustaqlığı verib. 

Rusiya “The Wall Street Journal”ın əməkdaşı Evan Qerşkoviçi casusluqda şübhəli bilərək həbs edib. Qəzet həbsi azad mətbuata qarşı təhqir adlandırıb. 

Rusiya şirkətlərinin Avropa İttifaqı (Aİ) ölkələrinə maye qaz göndərilməsinin dayandırılması təklifləri Aİ-nin enerji komissarı Kadri Simson tərəfindən müsbət qarşılanıb. 

Ukraynanın idman naziri Vadim Hutsait ötən şənbə günü bildirib ki, müharibədə 262 ukraynalı idmançı ölüb və 363 idman obyekti dağıdılıb. Bu səbəbdən nazir Rusiyadan heç bir idmançının Olimpiadaya və ya digər idman yarışlarına buraxılmamasını təklif edib. 

Vasif