Xəbər verdiyimiz kimi, Nyu York Böyük Münsiflər Heyəti çoxdan gözlənilən hökmünü açıqlayıb və ABŞ-ın keçmiş prezidenti Donald Trampın Stormi Denielsə 130 000 ABŞ dolları məbləğində “sus payı” ödəməsi ilə bağlı məhkəmə qarşısına çıxarılacağına hökm verib. 

Tramp özünə qarşı ittihamları rədd edib, prokurorları “korrupsioner və siyasi” olmaqda günahlandıraraq ardıcıllarını etiraza çağırıb. 

O, ABŞ tarixində mühakimə olunan ilk eks-prezident olduğu üçün polis “fövqəladə iğtişaşlar” üçün həyəcan təbili çalır. Digər tərəfdən, Tramp tərəfdarlarının gözlənilən etirazları başlayıb.

“The Telegraph”ın yazarı Nik Allen bütün bunların Trampın lehinə işlədiyini iddia edib. 

O, qələmə aldığı yazıda Donald Trampı ittiham etmək qərarının onun 2024-cü ildə Respublikaçılar Partiyasından prezidentliyə namizədlik kampaniyasına raket yanacağı əlavə edəcəyini vurğulayıb:

“Aylarla o, Demokratları hüquq sistemini silahlandırmaqda günahlandıra biləcək və haqqındakı bu cinayət işi indiyə qədər malik olduğu ən təsirli fandreyzinq vasitəsinə çevriləcək.

Bundan öncə belə respublikaçılar artıq onun arxasında toplaşır, potensial təqibi siyasi motivli adlandıraraq pisləyirdilər. 

Konqresdə Respublikaçıların rəhbərlik etdiyi komitələr porno ulduz Stormi Denielsə “sus payı” ödəməsi ilə bağlı ittiham irəli sürən prokuror Elvin Breqq haqqında araşdırmalara başlayır. Onlar Manhetten dairəsinin prokuroru cənab Breqqi hakimiyyətdən görünməmiş sui-istifadədə ittiham edirlər. Hətta Ron DeSantis də bir qədər gecikdikdən sonra küləyin hansı tərəfə əsdiyini gördü və rəqibi cənab Trampı dəstəkləyərək cənab Breqqə qarşı çıxdı.

Trampa qarşı ittihamlar getdikcə parçalanan Respublikaçılar partiyasını birləşdirə biləcək yeganə güc kimi görünür”.

Nik Allen yazısında respublikaçı senator və Trampın müttəfiqi Lindsi Qremdən sitat gətirib:

“Qremin də dediyi kimi: "Nyu-York prokuroru Trampın president seçilməsi üçün hamıdan daha çox iş gördü. Cənab Breqq, siz cənab Trampa heyrətamiz dərəcədə kömək etdiniz".

Məqalə müəllifi, həmçinin qeyd edib ki, hazırda bir çox demokrat  Trampı qolları qandallı görmək ehtimalının dadını çıxarmaq əvəzinə, Breqqi "uçurumdan geri çəkilməyə" çağırır.

Yazıda “Prokuror niyə “zombi işini” diriltdi?” sualına da cavab axtarılıb:

“Cənab Breqqin üzə çıxarmaq üçün daha güclü bir iddiası olsaydı, ssenari fərqli ola bilərdi. Lakin son 7 ildə “sus payı” ödənişi digər prokurorlar tərəfindən də dəfələrlə gündəmə gətirilib. Bu, o qədər ölü məsələ idi ki, cənab Breqq bu yaxınlarda onu gündəmə gətirəndə, digər prokurorlar tərəfindən "zombi işi" adlandırıldı.
Demokratların məyusluğu odur ki, cənab Trampın daha çox mühakimə oluna biləcəyi başqa hüquqi problemlər var. Onlardan biri Gürcüstanda onun 2020-ci il seçkilərinin nəticələrini ləğv etmək cəhdlərində iştirakı ilə bağlı aparılan araşdırmadır. Oradakı prokurorlar şantaj və sui-qəsd ittihamlarını nəzərdən keçirir, lakin qərara gəlmək üçün vaxt lazımdır.

Yüksək səviyyəli bir demokrat dedi: "İstənilən güclü vəkildən soruşun. sizə bunun [sus payı ödəməsinin] ən zəif ittiham olduğunu söyləyəcək".

Məqalə müəllifi artıq ağıllarda prokurorla bağlı sual işarələri yarandığını diqqətə çatdırıb:

“49 yaşlı cənab Breqq, şübhəsiz ki, heç kimin qanundan üstün olmadığını söyləyərdi. Amma bu arqument onun üçün problemlidir.

O, 2022-ci il yanvarın 1-də həbs edilməyə müqavimət göstərmək, icazəsiz şəxsi mülkə girmək və qadın alveri ilə məşğul olmaq kimi bəzi cinayətləri mühakimə etməyəcəyini elan edərək vəzifəyə gəldi. Cənab Trampın tərəfdarları soruşurlar ki, niyə prokuror bu cinayətkarların arxasınca getmir və bunun əvəzinə qeyri-müəyyən bir maliyyə pozuntusuna görə Respublikaçı keçmiş prezidenti hədəf alır?

Trampın seçki kampaniyası üzrə keçmiş müşaviri Devid Urban deyib:

"Niyə, yeddi il sonra? Düşünürəm ki, əgər keçmiş prezidentə qarşı ittiham irəli sürürsünüzsə, onu məhkum edə bilsəniz, daha yaxşı olar. Prokuror güzgüyə baxıb özünə bu sualı verməlidir. Çünki burada onu məhkum etmək şansını əlindən qaçırsa, sonra daha ciddi ittihamlar da gözdən düşə bilər. 

Nik Allen bütün baş verənlərdən sonra Trampın yenidən prezident seçilmək şansının yüksək olduğunu qeyd edib:

“Cənab Breqqin ittihamları xanım Denielsin iddia etdiyi münasibət barədə ictimaiyyətə açıqlamalarının qarşısını almaq üçün 2016-cı il seçkilərindən əvvəl ödənilən 130 min dollarla bağlıdır. Cənab Tramp isə bunu rədd edir. İttihamın motivlərinin nə olmasından asılı olmayaraq, Tramp üçün özünü siyasi “təqiblərin qurbanı kimi göstərmək” asan olacaq.

“Quinnipiac”ın son rəy sorğusu göstərdi ki, respublikaçıların 93 faizi Trampa qarşı işin siyasi motivli olduğuna inanır. Sorğuya görə, müstəqillərin 70 faizi, hətta demokratların 29 faizi bu fikirdədir”. 

Lalə
Sfera.az