Ukraynaya tükənmiş uran sursatlarından istifadə qadağan oluna bilər.

Sfera.az bildirir ki, bu barədə  Zelenski ofisinin saytında petisiya yayılıb. Müraciətdə bu cür mərmilərin həm ətraf mühitə, həm də bəşəriyyətə ziyanı vurğulanıb. Qeyd olunub ki, petisiya 25 min imza toplaya bilsə, Ukrayna prezidenti bunu nəzərdən keçirməli olacaq.

“Belə sursatların istifadəsi bəşəriyyətə və planetə qarşı cinayətdir. Onların istifadəsi qəbuledilməzdir. Bu petisiyaya baxılmasını və müraciətə yekun vurulana qədər Ukrayna Silahlı Qüvvələri tərəfindən belə sursatların istifadə edilməməsi üçün təhlükəsizlik tədbirlərinin görülməsini tələb edirik”, - Zelenski İdarəsinin saytındakı petisiyada qeyd olunub.

Qeyd edək ki, Britaniya müdafiə nazirinin müavini Annabel Qoldi tükənmiş uran mərmilərinin Kiyevə təhvil veriləcəyini bəyan edib. Onun sözlərinə görə, bu cür döyüş sursatları müasir tanklar və zirehli texnikaları məğlub etmək üçün effektivdir.  Qoldinin sözügedən bəyanatı  ciddi reaksiyaya səbəb olub. Bir çox siyasətçilər və hərbi ekspertlər Britaniya hakimiyyətinin bu qərarını Ukrayna müharibəsində qarşıdurmanı daha da tətikləyən addım kimi qiymətləndiriblər.

Günay Rəsulqızı