"Üçüncü Dünya Müharibəsinin qarşısını ala biləcək yeganə insanam" – Tramp
ABŞ-da gələn il keçiriləcək prezident seçkilərində namizəd olacağını açıqlayan keçmiş prezident Donald Tramp Amerika Mühafizəkarlar İttifaqının təşkil etdiyi konfransda çıxış edib.
Sfera.az xarici mətbuata istinadən bildirir ki, Tramp 1 saat 45 dəqiqə davam edən çıxışındakı iddiaları ilə gündəmə gəlib.
"Üçüncü Dünya Müharibəsinin başlamasının qarşısını alacaq yeganə insan mənəm" deyən sabiq prezident bir ildən artıqdır davam edən Rusiya-Ukrayna müharibəsini isə “bir gündə” bitirə biləcəyini iddia edib.
O, həmçinin prezidentlik dövründə özünün həyata keçirdiyi Rusiya və Çin siyasətini də tərifləyib.
Hazırda ABŞ-ın azad ölkə olmadığını və ölkədə azad mətbuatın da mövcud olmadığını iddia edən Tramp, “Mən sizin səsinizəm, döyüşçünüzəm, ədalətinizəm. Zülm və xəyanətə məruz qalanlar, mən sizin intiqamınızam”, - deyib.
ABŞ-ın Əfqanıstanı biabırçı şəkildə tərk etdiyini deyən eks prezident Talibanın ABŞ-ın Əfqanıstanda qoyduğu silahları başqa ölkələrə satdığını da diqqətə çatdırıb.
Co Bayden administrasiyasını tənqid edən eks prezident “Biz Baydeni Ağ Evdən çıxaracağıq”, - deyə qeyd edib.
Lalə
Sfera.az
