Rumıniyanın Baş naziri Nikolae-Yonel Çuke süni intellektlə işləyən İon adlı robotu özünə yeni müşavir təyin edib. 

Sfera.az xarici mətbuata istinadən xəbər verir ki, böyük şüşə ekrandan ibarət rəqəmsal interfeysə malik robot rumıniyalı tədqiqatçılar tərəfindən hazırlanıb.

Baş nazir onun "dünyada süni intellektlə işləyən ilk hökumət müşaviri" olduğunu diqqətə çatdırıb:

"Hesab edirəm ki, süni intellektdən istifadə bir seçim deyil, daha çox məlumatlı qərarlar qəbul etmək zərurət olmalıdır".

Digər tərəfdən, Baş nazir sistemi işə saldıqda İon bunları deyib:

"Salam, mənə həyat verdin və mənim rolum indi səni güzgü kimi təmsil etməkdir. Rumıniya haqqında nə bilməliyəm?"

Robotun dizaynını həyata keçirən qrupun rəhbəri olan Niku Sebe onun bəzi nöqtələrə yerləşdiriləcəyini və vətəndaşların İona öz istəklərini çatdıra biləcəklərini qeyd edib. Sebe, həmçinin İon üçün xüsusi internet saytının hazırlandığını, proqramın burada və sosial mediada göndərilən fikirləri, sorğuları qeyd edəcəyini vurğulayıb. 

Araşdırma və İnnovasiyalar naziri Sebastyan Burduya isə İonun bu məlumatları təhlil edəcəyini və Baş nazir üçün rumınların istəkləri, fikirləri ilə bağlı hesabatlar hazırlayacağını deyib.

“Politico”ya danışan İrlandiya qeyri-kommersiya təşkilatı İrlandiya Vətəndaş Azadlıqları Şurasından Kris Şrişak texnologiyadan ehtiyatla istifadə edilməli olduğunu söyləyib. İonun hansı məlumatların vacib olub-olmamasına necə qərar verəcəyinin açıqlanmadığına diqqət çəkən Şirşak bu barədə ictimaiyyətin məlumatlandırılmasını vacib hesab edib. 

Lalə
Sfera.az