\"İrana nüvə bombası üçün material hazırlamağa 12 gün lazımdır\" - ABŞ rəsmisi

İrana nüvə bombası üçün material hazırlamağa 12 gün lazımdır.

Sfera.az xəbər verir ki, bunu ABŞ müdafiə nazirinin siyasi məsələlər üzrə müavini Kolin Kal Nümayəndələr Palatasında dinləmələr zamanı deyib.

Onun sözlərinə görə, Donald Tramp administrasiyası Birgə Hərtərəfli Fəaliyyət Planından çıxdıqdan sonra İran nüvə bombası hazırlamaq qabiliyyətini xeyli yaxşılaşdırıb.

“2018-ci ildə əvvəlki administrasiya proqramdan çıxmaq qərarına gəldikdə, İranın bir bomba üçün parçalanan material istehsal etməsi təxminən 12 ay çəkməli idi. İndi onlara bunu etmək üçün 12 gün lazımdır”, - Pentaqon nümayəndəsi qeyd edib. 

Beynəlxalq Atom Enerji Agentliyinin (MAQATE) müfəttişləri də bunu bir həftə əvvəl İranda 84 faiz zənginləşdirilmiş uran ehtiyatlarını aşkar etdikdə açıqlamışdılar. İndiyə qədər Tehranın uranı 60 faizdən yuxarı zənginləşdirmək üçün avadanlıqlara malik olmadığı güman edilirdi.

Əzizə