Yenə müharibədən qaçan ruslar- 2 aydı hava limanında məskunlaşıblar

Rusiyada səfərbərlikdən qaçan beş rusiyalı İncheon hava limanında ilişib qalıb.
 

Sfera.az bildirir ki, “The Korea Times”ın yaydığı məlumata əsasən, onlar qaçqın statusu ala bilmədiklərinə görə hava limanının binasında yaşayırlar.
 

Ruslardan biri, 23 yaşlı Vladimir Maraktayev Buryat Dövlət Universitetinin 2-ci kurs tələbəsidir. Sentyabrın 24-də hərbi xidmətə çağırıldıqdan sonra ölkəni tərk etmək qərarına gəlib.


Vladimir Maraktayevin gündəliyi



"Sentyabrın 24-nə keçən gecə, hərbi xidmətə çağırış vərəqəsini alandan bir neçə saat sonra evdən çıxdım. Səhər yanıma gələcəkləri üçün mümkün qədər tez getməyə qərar verdim. Vətənimi müdafiə etməkdən utanmıram. Kimsə bizə hücum edərsə və yaxınlarımı təhlükəyə atarsa, mən könüllü olaram. Amma təcavüzkar mənim öz ölkəmdirsə, bu, tamam başqa məsələdir. Mən heç vaxt Ukraynada günahsız insanları öldürmək üçün silaha sarılmayacağam"- deyə Maraqtayev bildirib.

Onun sözlərinə görə, həmin gecə o, hərbi xidmətə çağırılan digər qonşuları ilə birlikdə maşına minib. Onlar Monqolustan sərhədini keçərək paytaxt Ulan-Batora gediblər. Oradan Maraqtaev Filippinin Manilaya uçub, cəmi bir neçə həftə qala bilib. Daha sonra İncheona təyyarə bileti alıb və orada qaçqın statusu almaq ümidi ilə noyabrın 12-də Cənubi Koreyaya enib.


Koreyada o, İncheon Beynəlxalq Hava Limanında qaçqın statusu almaq üçün müraciət edib, lakin hökumət ilkin qiymətləndirmə mərhələsində onun müraciətini rədd edib.

Qeyd edək ki, Koreya qaçqın qanunvericiliyinə əsasən, sığınacaq axtaranlar giriş limanında status üçün müraciət edə və əvvəlcədən qiymətləndirmə müsahibəsindən keçə bilərlər. Əgər immiqrasiya orqanları öz səbəblərini əsaslı hesab edərlərsə, ərizəçilər əlavə yoxlamadan keçə bilərlər. Əks halda, yəqin ki, vətənə qaytarılacaqlar.
 

Eyni zamanda Ədliyyə Nazirliyi rusların qaçqın statusunun verilməsi ilə bağlı müraciətlərinə baxıldığını bildirib. Onlar yoxlama prosedurunun qanunvericiliyə uyğun aparıldığını, rusların sonradan deportasiya olunmaq üçün saxlanmadığını qeyd ediblər.


Eyni zamanda, Ədliyyə Nazirliyi qeyd edib ki, ölkə daxilində orduya çağırışdan yayınma qaçqın statusunun verilməsi üçün tutarlı səbəb deyil. Hazırda rusları deportasiyanın gözləyib-gözləmədiyi məlum deyil.


Xatırladaq ki, yanvarın 9-da Rusiya prezidenti Vladimir Putinin mətbuat katibi Dmitri Peskov ölkədə yeni səfərbərlik dalğası barədə məlumatı şərh edib. O, “bu mövzuda artıq dəfələrlə deyilib” ifadəsini işlədib və əlavə edib ki, “Telegram kanallarına önəm verməyə ehtiyac yoxdur”.


Bundan əvvəl, yanvarın 6-da isə Baş Kəşfiyyat İdarəsinin nümayəndəsi Vadim Skibitski bildirmişdi ki, Kreml səfərbərliyin yeni dalğası keçirməyi və RF Silahlı Qüvvələrini 500 min hərbçi ilə doldurmağı planlaşdırır. Onun sözlərinə görə, bu, yanvarın 15-dən başlaya bilər və onlar hərbi xidmətə çağırılan rusları yaz-yay aylarında Ukraynanın şərqində və cənubunda Rusiya Silahlı Qüvvələrinin hücum əməliyyatlarına cəlb etmək istəyirlər.

Xanım