ABŞ Ukraynaya ən böyük hərbi yardım paketini təqdim edib.

Sfera.az bildirir ki, bu barədə Ağ Evin mətbuat katibi Karine Jan-Pyer məlumat verib. O qeyd edib ki, Kiyev 3 milyard dollar məbləğində yardım alacaq.

“Birləşmiş Ştatlar yeni hərbi yardım paketini elan etməklə Ukraynanın özünü müdafiə qabiliyyətini təmin etmək üçün davamlı öhdəliyini nümayiş etdirəcək. Eyni zamanda ABŞ-ın Ukraynaya yeni hərbi yardım paketinə onun uzunmüddətli hərbi potensialının gücləndirilməsi və Ukrayna Silahlı Qüvvələrinin modernləşdirilməsi üçün 225 milyon dollar da daxildir”, - deyə o söyləyib.

Qeyd olunub ki, silahların alınması üçün NATO-nun şərq cinahındakı ABŞ tərəfdaşlarına da 682 milyon dollar da ayrılır.

Xatırladaq ki, Qərb ölkələri Kiyevə hərbi və maliyyə yardımı göstərməklə fəal şəkildə dəstək verir. Xüsusilə Almaniya Ukraynaya hərbi dəstəyi yeni səviyyəyə qaldıracaqlarını açıqlayıb. Hazırda Almaniya hakimiyyəti Ukraynaya “Marder” piyada döyüş maşınları və “Patriot” hava hücumundan müdafiə sistemlərinin tədarükü imkanlarını nəzərdən keçirir. Rusiya səfirliyi isə Almaniyanın Milad bayramları ərəfəsində bu davranışını “kinli qərar” adlandırıb.

Günay Rəsulqızı