İsrail üçün ən böyük təhdid nədir? – İran, yoxsa...
"2023-cü ildə qlobal təhdidlərin İran üçün daha ciddi təhlükə törədəcəyi proqnozlaşdırılır".
Bunu Sfera.az-a açıqlamasında politoloq Əlimusa İbrahimov deyib. O, İsrailin İran üçün təhdid olmadığını bildirib:
"İranın İsrail üçün artıq ən ciddi təhlükə olmadığı barədə bu günlərdə yəhudi dövlətinin kütləvi informasiya vasitələri məlumat yayıb. Onlar öz məlumatlarında hərbi kəşfiyyat orqanlarına istinad edirlər. 2023-cü ildə qlobal təhdidlərin ölkə üçün daha ciddi təhlükə törədəcəyi proqnozlaşdırılır. İran qlobal problemlərdən sonra İsrailin üzləşəcəyi ikinci çağırış kimi dəyərləndirilir. Bu, eyni zamanda İsrailin Amerika Birləşmiş Ştatları ilə birlikdə İrana qarşı apardığı uzunmüddətli mübarizənin nəticəsi hesab oluna bilər. İsrailin İranla qarşıdurmada müəyyən nailiyyətlər əldə etməsi göz qabağındadır. Bu, özünü İranda 100 gündən artıq davam edən iğtişaşlarda, İran iqtisadiyyatının çökmək üzrə olmasında, milli valyutanın kəskin şəkildə ucuzlaşmasında göstərir. Amma bir nömrəli təhdid kimi qiymətləndirilməməsi israilin İrana qarşı apardığı qarşıdurmanın səviyyəsinin aşağı düşəcəyi anlamına da gəlməməlidir. Əksinə, İranın zəifləməsi İsrailin ona qarşı mübarizədə yeni taktikaların tətbiq edilməsi ilə nəticələnəcək ki, bu da özünü Tehranın nüvə tədqiqatı sahələrinə hücumlarda göstərə bilər. Artıq İsrailin İrana qarşı müharibəyə daha da yaxınlaşması heç kimdə şübhə doğurmur. Bu addımın 2023-cü ildə atılacağı da ən ciddi ehtimallar içərisindədir".
Ekspert 2023-cü ildə iki ölkənin qarşı-qarşıya gələcəyini qeyd edib:
"İran-İsrail müharibəsinin qarşısını yalnız İranda baş verən daxili-siyasi vəziyyətin, qarşıdurmanın inkişaf tempi müəyyən edəcək. Ola bilər ki, İrandakı iğtişaşlar daha da inkişaf edərək molla rejiminin dağılması ilə nəticələnər. Bu zaman İsrailin də müharibəyə girməsinə ehtiyac qalmayacaq. Amma bu ehtimal xeyli zəifdir. İsrailin üzləşəcəyi başqa təhlükə ABŞ-Çin qarşıdurmasıdır. Bu qarşıdurmanın növbəti ildə daha da kəskinləşəcəyi gözlənilir. Bu mənada İsrail də müəyyən mənfi təsirlərə məruz qalacaq. Rusiya ilə Ukrayna arasında gedən müharibə qlobal təchizat zəncirinin qırılmasına səbəb olacaq . Bu da bütün dövlətlərin gündəlik tələbat malları ilə təchiz olunmasında ciddi problemlər yaradacaq. Bu problemlərin qlobal səviyyəyə qalxması da İsrail üçün təhdid kimi qiymətləndirilir".
Əzizə Zeynal
