Türkiyə prezidenti Rəcəb Tayyib Ərdoğan rusiyalı həmkarı Vladimir Putinə  Bəşər Əsədin iştirakı ilə üçtərəfli görüş keçirməyi təklif edib.

Sfera.az bildirir ki, bu barədə Ərdoğan jurnalistlərə açıqlamasında deyib. 

"Lakin bunun üçün əvvəlcə xüsusi xidmət orqanlarının nümayəndələri, daha sonra müdafiə nazirləri və xarici işlər nazirliklərinin rəhbərləri görüşməlidir. Bu müzakirələrin nəticələrinə əsasən, liderlərin görüşündən danışmaq mümkün olacaq.  Mən bunu Putinə təklif etdim və o, müsbət qarşıladı. Bu istiqamətdə bir sıra danışıqlar başlayacaq”, - Türkiyə lideri söyləyib.

Türkiyənin Suriyada quru əməliyyatı keçirmək planlarına toxunan Ərdoğan qeyd edib ki, rəsmi Ankara Rusiya, Türkiyə və Suriyanın birgə addımlarının tərəfdarıdır. O, bununla bağlı 2019-cu il Soçi memorandumunda əksini tapmış qərarı xatırladıb:

"Həll yolu sərhədlərimizin cənubunda 30 kilometrlik təhlükəsizlik dəhlizinin yaradılmasından keçir. Biz bunun üçün bütün lazımi addımları atacağıq. Burada yeni heç nə yoxdur, Astanada, daha sonra Soçidə müzakirə olunub. Eyni zamanda Suriya məsələsində Rusiya ilə koordinasiyamız da yeni bir şey deyil”.

Türkiyə lideri vurğulayıb ki, qonşu ölkə ərazisindən gələn terror təhlükəsi və Qərbin, əsasən də ABŞ-ın terror təşkilatlarına dəstək verməsi ilə bağlı Ankaranın səbri tükənib: “İlk növbədə ABŞ-a deyirik ki - orada fəaliyyət göstərən terror təşkilatlarına minlərlə yük maşını dolu silah, sursat və texnika göndərməyə davam etsəniz, özümüzü qorumaq üçün addımlar atacağıq”.

Günay Rəsulqızı