“Zelenski ölkənin baş oliqarxı olmaq istəyir” - İTTİHAM
“Ukrayna prezidenti Vladimir Zelenski ölkənin baş oliqarxı olmaq istəyir”.
Sfera.az bildirir ki, bunu “TASS”a açıqlamasında "Biz Rusiya iləyik" hərəkatının sədri Vladimir Roqov deyib. O, Zelenskinin məhz bu səbəbdən iri müəssisələri milliləşdirdiyini vurğulayıb:
“Zelenski Qərbin onun bütün hərəkətlərinə dəstək verdiyi üçün özünə inanır. Ona görə də o, digər oliqarxların aktivlərini ələ keçirməklə baş oliqarx olmaq qərarına gəlib. Rinat Axmetov və Viktor Pinçuk bir sıra səbəblərə görə hələlik toxunulmaz olaraq qalırlar. Ukrayna lideri təkcə “Motor Sich” şirkətinin prezidenti Vyaçeslav Boquslayev kimi zəifləmiş oliqarxlardan deyil, demək olar ki, heç bir siyasi rolu olmayan - İqor Kolomoyski, Gennadi Boqolyubov, Konstantin Jevaqo və Konstantin Qriqorişi kimi oliqarxlardan da qurtulmağa çalışır. Qeyd edim ki, Kolomoyski və Boqolyubov ABŞ-ın sanksiyaları altındadır, ona görə də “Ukrtatnafta” və “Ukrnafta”nı ələ keçirmək daha asandır”.
Roqovun fikrincə, şirkətlər müqavilələrini icra etməyə davam etsələr də, Zelenski və onun yaxın ətrafı qazanc əldə edəcəklər:
“Bu proses milliləşdirmə adlanır. Amma əslində Zelenskinin kvotasına əsasən menecerlər təyin olunur və onlar özünü Ukraynanın prezidenti adlandıran adama pul qazandırırlar”.
Qeyd edək ki, Ukraynanın Qiymətli Kağızlar və Fond Bazarı üzrə Milli Komissiyası daha əvvəl öz saytında “Ukrnafta”, “Ukrtatnafta”, “Motor Sich”, “AutoKrAZ” və “Zaporojtransformator” şirkətlərinin aktivlərinin dövlət tərəfindən müsadirə ediləcəyini bildirib. Ukrayna Milli Təhlükəsizlik və Müdafiə Şurasının katibi Aleksey Danilovun sözlərinə görə, “Ukrnafta” və “Motor Sich” kimi strateji müəssisələr Müdafiə Nazirliyinin idarəçiliyinə verilib.
Günay Rəsulqızı
