“Müdaxilə edirdik, edirik və edəcəyik...” - “Putinin aşpazı” ABŞ seçkiləri haqda

Rusiyanın muzdlu şirkəti olan “Vaqner Qrup”un yaradıcısı Yevgeni Priqojinin son paylaşımı səs-küy  yaradıb.

Sfera.az bildirir ki, “Putinin aşpazı” kimi tanınan Priqojin Moskvanın ABŞ seçkilərinə müdaxilə etdiyini və bundan sonra da müdaxilə edəcəyini bildirib. Rusiya sosial media platforması olan “Vkontakte”də yayımlanan sözügedən açıqlamada "cənablar, müdaxilə edirdik, edirik və edəcəyik. Biz hər zaman etdiyimiz kimi özümüzə uyğun şəkildə, diqqətli, qüsursuz, cərrah kimi müdaxilə edirik. Mövqe müəyyən etmək əməliyyatlarımızda iki böyrəyi və ciyəri eyni anda sökəcəyik", deyə qeyd olunub.

Maraqlıdır ki, bu bəyanat ABŞ-da aralıq seçkilərə bir gün qalmış yayımlanıb.  Bu sözlərlə isə rusiyalı iş adamı illərdir rədd etdiyi ittihamları ilk dəfə təsdiqləyib. Digər tərəfdən, Ağ Evin mətbuat katibi Karine Jan-Pyer Priqojinin sözlərinə reaksiya verib. O, “Vaqner Qrupu”nun rəhbərinin açıqlamalarını təəccüblü hesab etməyib və yeni bir şeyin olmadığını deyib. Priqojinin ABŞ, Böyük Britaniya və Avropa Birliyinin sanksiya siyahısında olduğunu qeyd edən sözçü “Yevgeni Priqojinlə əlaqəsi olan şəxslərin ABŞ da daxil olmaqla,  bütün dünyada seçkilərə təsir etmək məqsədi güddükləri hamıya yaxşı məlumdur”, deyə söyləyib.

Qeyd edək ki, bu gün ABŞ-da aralıq seçkiləri üçün sorğular başlayıb.

Günay Rəsulqızı