Medvedev onları “itxanadan hürən sürü” ADLANDIRDI
Rusiya Təhlükəsizlik Şurasının sədr müavini Dmitri Medvedevin son paylaşımı gündəm olub.
Sfera.az bildirir ki, Medvedev “Telegram” kanalında noyabrın 4-də qeyd olunan Milli Birlik Günü münasibətilə fikirlərini bölüşüb. Rusiyanın niyə müharibə apardığını, kiminlə vuruşduqları barədə danışan sədr müavini bu fikirləri qeyd edib:
“Rusiya böyük və zəngin ölkədir. Bizə yad ərazilər lazım deyil, bizdə hər şey boldur. Amma bizim üçün müqəddəs olan, bir zamanlar ata-babalarımızın, indi isə xalqımızın yaşadığı torpağımız var və bunu heç kimə verməyəcəyik”.
Medvedevin Rusiyanın mübarizə apardığı şəxslərlə bağlı düşüncələri isə ən çox səs-küy yaradan nüanslardan olub. “Biz hazırda bir dəstə çılğın nasist narkomanlara, onlar tərəfindən qorxuya məruz qalan insanlara və qərb itxanasından hürən böyük bir sürüyə qarşı mübarizə aparırıq. Əslində bütün düşmənləri odlu cəhənnəmə göndərmək imkanımız var. Lakin bu, bizim vəzifəmiz deyil. Yaradanın sözünü qəlbimizdə dinləyir və ona əməl edirik. Bu sözlər bizə müqəddəs məqsəd verir. Məqsəd isə hansı addan istifadə etməsindən asılı olmayaraq, cəhənnəmin ali hökmdarını – Şeytan, Lüsifer və ya İblisi dayandırmaqdır. Çünki onların məqsədi ölümdür. Bizimki isə həyat...Onların silahı mürəkkəb yalandır, bizdə isə həqiqət...Ona görə də davamız haqq davasıdır və qələbə bizim olacaq!”, deyə o söyləyib.
Rusiyanın keçmiş dostlarından danışan siyasətçi onları “qorxmuş tərəfdaşlar” adlandırıb: "Onlara əhəmiyyət verməyin. Onlar bizim dostumuz yox, təsadüfi yoldaşlar idi”.
Günay Rəsulqızı
