Yunanıstan-Türkiyə gərginliyi davam edir.

Sfera.az bildirir ki, Türkiyənin ilk yerli və milli qısamənzilli ballistik raketi “Tayfun”un sınaq atəşindən panikaya düşən Afina bu dəfə İsraillə birlikdə yeni hərbi təlim mərkəzi açıb.

“Associated Press” bunu Türkiyəyə qarşı atılan addım kimi qiymətləndirib. Agentliyin xəbərində “Yunanıstanın regional rəqibi Türkiyəyə qarşı hava gücünü inkişaf etdirməyə çalışdığı bir vaxtda İsraillə birgə yaradılmış yeni beynəlxalq pilot təlim mərkəzi fəaliyyətə başlayıb”, deyə qeyd olunub.

Məlumata görə, təlim mərkəzinin 2024-cü ilin əvvəlinə qədər tam fəaliyyət göstərməyəcəyi bildirilsə də, obyektin istismarına ötən il Yunanıstan hökuməti ilə 1,65 milyard dollarlıq müqavilə imzalayan İsrailin müdafiə firması “Elbit” kömək edəcək. Yunanıstan Hərbi Hava Qüvvələrinin təlim komandiri general-mayor Georgios Vagenas çıxışı zamanıTürkiyənin adını çəkməsə də, eyham vuraraq bu sözlərdən istifadə edib:

“Təlim mərkəzi yeni alınan döyüş təyyarələri üçün pilotlar hazırlayacaq və qonşularımızdan tutmuş Şərqdən gələn təhlükələrə qarşı əsas mexanizm olacaq”.

Qeyd edək ki, son illərdə Yunanıstan köhnəlmiş F-16 qırıcı donanmasını, yeni alınmış Fransa istehsalı olan “Rafale” təyyarələri ilə əvəzləyib, o cümlədən ABŞ-ın F-35 proqramına qoşulmağa cəhd edib.

Günay Rəsulqızı