Rusiyanın Ukrayna müharibəsində verdiyi hərbi itkilər və yanlış strateji qərarlar bir müddətdir dünya mediasının gündəmindən düşmür.

Sfera.az bildirir ki, son həftələrdə yeni hərbi xidmətə qəbul edilən rus əsgərlərinin cəmi bir neçə günlük təlimdən sonra cəbhəyə göndərildiyi deyilir. Qeyd olunur ki, yeni səfərbərlik əmri ilə cəbhəyə yola salınan əsgərlərin bir neçəsi artıq həyatını itirib. Bu iddialar İngiltərə mətbuatında da öz əksini tapıb. Ailələrin uşaqları üçün zireh və digər qoruyucu vasitələr aldığı bildirilib.

“The Telegraph” qəzeti isə daha maraqlı iddia irəli sürüb. Qəzet yazıb ki, Ukraynada döyüşmək üçün səfərbər olunan rus kişiləri plastik peyntbol maskaları, uşaq əlcəkləri və rezin çəkmələrlə təchiz olunub. Rusiyanın cənubundakı Stavropol bölgəsindən yayımlanan video isə bunu sübut edib. Belə ki, görüntünü çəkən və yayan anonim rus əsgəri əlində plastik peyntbol maskası tutaraq “Səfərbər edilmiş döyüşçülər üçün bu “isti” hədiyyələrə görə təşəkkür edirəm. Onlar elə bilirlər ki, bu əşyalardan istifadə edərək “Star Wars” kimi ortalıqda gəzəcəyik - məqsədsiz və hədəfsiz”.

Sözügedən rus əsgəri görüntülərdə ən çox uşaq əlcəklərini tənqid edib və “Onlar əlimə olmur, buradakı heç bir döyüşçünün əlləri verilən əlcəklərə sığmır”, deyə bildirib. Daha sonra o, rezin çəkmələri yoxlayıb və çox keyfiyyətsiz olduğu üçün onları atacağını söyləyib: "Onlar bizi qışa belə hazırlayırlar".

“Kommersant” qəzetinin yazdığına görə, hərbi və açıq geyimlərə tələbat o qədər artıb ki, hazırda Rusiyada bədən zirehləri 1115 funt-sterlinqə, bir bel çantası 560 funt-sterlinqə, uyğun termal alt paltarın qiyməti isə 300 funt-sterlinqə qalxıb.

Qeyd edək ki, bu, Rusiyada 1941-ci ildən bəri elan edilən ilk səfərbərlikdir. Qərarın Rusiya ordusunu əlavə 300 min əsgərlə gücləndirəcəyi gözlənilirdi.

Günay Rəsulqızı